A dawngtu tur ni lo kuta lut

Agriculture minister chuan Assembly session neih mekah zawhna chhanga sawiin kuthna­thawktute tui lakna atana subsidy-a pek ṭhin polythene pipe-te chu a dawngtu tur dik takte'n an dawng lo ṭhin nia a hriat thu sawiin, "A dawng tur dik takte'n an dawn theihna atan MLA-te hnenah kan sem a ni," a ti. 

Mi ṭhenkhat chuan fiamthu titakin Mizoramah hi chuan sorkar ṭan­puina tel loin kut­hnathawktute hi an awm thei a, sorkarin kut­hnathawk­tute tana a din depart­ment-te hi ṭhiatin a sum faiin kuthna­thawktute hi ṭanpui se sorkar a hlawk zawk ang, an ti ṭhin. He thusawi hi thil dik chu a ni hauh lo ang a; nimahsela ngaihtuah zui theih tak thil a awm a, chu chu Agricultute minis­ter-in House-a a sawite nen hian a inkungkaih thui thei hle awm e. 

Sorkar laipui leh state sorkar hian kuthnathawktute tan hian sum hi a seng hnem hle tawh a, an tan hamṭhatna tam tak an siam a, a sum faia ṭanpuina an sem chang a awm a, an mamawh thlai chi leh bungrua an pek chang a awm bawk. Sorkar hian kuthnathawktute tan hian ṭan a la nasa ṭhin hle. Heti chung hian kuthnathawktute chu an la bet tlawk tlawk reng a, sorkar hna hniam ber nia lang pawh a hlawk zawka a lan miau avangin kuthnathawktute hian puih an la ngai hle tih chu thil chiang a ni.

Tun hnaiah pawh ṭanpuina leh hamṭhatna lo kal ang angte kuthnathawktu, a taka beitu leh eizawnna atana hmangtu tak takte kutah a lut lo fo a, dil nachang hria leh hetiang thila bengvar riaute hian an dil khalh fo ṭhin a, a pawi hle. Agriculture minister sawi ang hian a taka thawktute hi chu lo lamah an awm deuh chawt a, office-a dilna thehlut hman pawh an ni lo a, a thiam pawh an thiam hek lo a, bialtu MLA-te hman ṭangkai hi ruahmanna fing tak niin a lang. 

Hei bakah hian milian ṭhenkhatin huan leh lo siam an intihhmuh mek a, heng mite hian eizawnna atan an hmang tak tak lo a, intih thawvenna leh 'hobby' ang lekin an kalpui a, sum leh hmunhmate an neih ṭhat avangin kuthnathawka eizawngte aia an thar ṭhat chang a awm. Heng mite kuta sorkar ṭanpuina leh kuthnathawktute tana ham­ṭhatna awm te a lut ṭhin hi a pawi a, thlai leh theite an lo thar ṭha deuh a nih pawhin eizawnna atana hmang lo na na na hi chu puih kân deuh zawk pawh a ṭha mai thei. Kuthnathawktute tana ṭan­puina leh hamṭatna lo kal reng reng hi chu a dawngtu tur dik takte kutah chauh lut rawh se.