Ṭhalaite hnathawh tur

Labour, Employment, Skill Development & Entre­preneurship (LESDE) minister Lalchhandama Ralte chuan, Mizoram Youth Commission (MYC) chhinchhiah danin, Mizoram páwna hna thawk, Covid-19 lêng avanga rawn haw mi 2,637 an awm thu Assembly House a hrilh.

Mizoramah hna a vang tiin hna ṭha zawk zawng turin kan ṭhalaite state pawna chhuak ngam turin kan infuih ṭhin a, Mizo ṭhalaite hi an hna phu tawka hlawh ṭha hmù tur chuan state pawnah an chhuak hreh lo hle tih tun hnaiah a lang chho mêk. Mizo ṭhalai zingah hna hniam pawh thawk hreh lo an pung chho zel a, mahni in chawm tur leh chhung­kua chawm tura hnathawh tur zawnga state pawna chhuak hi an ṭhahnem ta hle. 

Heti taka ṭhalai hna zawng an awm hian sorkar pawh a fimkhur zual a ṭul sawt tih a inhriat a ngai a, ṭhalai rualin hlawh neih duha ram pawn pawh an pan hram hram tawh lai hian state chhunga sorkar hna awm ang angte hi dik leh fel fai tak chauhin la hram rawh se. Mahni rama hnathawh tur hmuh loh vanga state pawna chhuakte an awm nawk tawh hnu hi chuan a hna awm chhun ang angah hi chuan a thiam leh tlingte chauh lâk ni ṭhin rawh rawh se. 

Ṭhalaite hnathawh tur zawn kawngah India sorkar pawhin ṭan lâk nasat a tum a, he lam hawi thil lian tham a kalpui chho nasa a; nimahsela India ramah mipui an ṭhahnem em avangin hna hmù lo an pung zel a, a intiam zat hna a siam theih loh avangin NDA sorkar pawhin dem a hlawh mêk. 

Hetiang karah hian kan state sorkar tán pawh hna thar siam belh hi thil harsa tak a ni dâwn a, ṭhalaite tán hna an pek belh thei lo a nih pawhin a awm chhun hi dik takin kalpui thei se a lawmawm ngawt ang.