Health Department audit chhan

Finance department changtu Chief Minister chuan Health department audit chhan sawifiahin, Covid-19 avangin sum hlawm lian tak tak, hmanraw chi hrang hrang hmanhmawh taka lei ngai a awm tiin, "Financial Rules leh Accounting Procedure ngaih­thah a hlauhawm em em a, nakin hunah AG audit hunah harsatna nasa zawk a awm loh nan leh an lo inven thiamna atan internal audit anga kalpui a ni," a ti.

Health depart­ment sum audit a ni khan titi a siam tam hle a, Covid-19 hripui doa ram pum kan buai vanglai taka a Covid-19 dotu department ber an sum endik a ni khan mak tih a hlawh viau a ni. Politics titi lamah phei chuan Health minister hi a mimala an ven avanga a department chan endik bîk angin an sawi hial a, eptu lam phei chuan Health minster dan chêp tumna angah an chhuah a ni deuh ber a, hri len laiin politics titi ngaihnawm tak a pian chhuah pha hial a ni.

Tunah chuan Chief Minister berin Assembly House-ah thil awm dan a sawi fiah ta a, hripui len lai leh sorkar pawh a buai lai taka hman­hmawh taka Health department an audit chuk chuk chhan chu mipuiin an hre ta. Mizo mipuite pawhin hripui len lai, office pawh inkal chhawk zak zak a nih laia hmanhmawh taka Health department audit chhan chu an hre tawh awm e.