Budget session leh mipui

Mizoram Legislative Assembly pariatna budget session chu February 23 khan ṭan niin March 17 khan zawh a ni a; Finance department enkawltu chief minister chuan Mizoram budget cheng vaibelchhe 11,148.89 chu a pharh a ni. 

He budget session hi local cable TV-ah live-a pek chhuah a ni a, Youtube lamah live-a en theih a ni bawk. Mipui pawhin an enin an ngaihven sawt hle a, chutih rual chuan kan rorelna in sang bera kan ram roreltute che vel hian en a la hlawh tawk lo hle. Kan budget session mipuiin an  ngaihven loh avang hian a mipui lam dem vak erawh a rem lo ang a, mipui ngaiven turin thil a la kal lo a ni thei. Kan budget hi kum tin a ngai deuh pet pet, sorkar hnathawkte hlawh leh inrelbawlnaa kal deuh vek a nih ṭhin vang pawh a ni mahna? 

Mipuiin an han ngaihven deuhte chu ṭawngkam hriam leh danglam deuha an inchhang te, sorkar kal dik lohna nia lang eptu lamin an hai lang te, sorkar lamin sorkar an chhan dan ṭawng­kamte leh thil danglam deuh thlen ni te hi a la ni deuh ber; budget-a pawisa dah zat chumiin a nghawng tur lam hi chuan sawi zui a hlawh vak lo a, mipui nawlpui tan sawi zui thiam tur a tam lo a ni thei. 

Tun ṭum session-a sawi zui hlawh deuh ber chu MNF lam member pakhat leh Congress member pakhat inchhang tawn vel boruak kha a ni a, Congress lamin press conference-a an sawi anga House pawna an lo inchhang a, an lo incho leh a nih tak tak ngat chuan a zialoin a zahthlak hle a ni. Ram hruaitute chu entawntlak tur an ni a, mihring ve bawk an nih avangin kawng tam takah chuan chak lohna an lo nei ve thei a; nimahsela Assemhly House chhung leh a chhehvelah bik chuan insum theihna an nei tur a ni a, zahawm taka awm hi an bat a ni. 

Kan state budget session-te hi mipuiin hlutin ngaihven deuh deuh ila, mipui ngaihven hlawh tur khawpin legislator lam pawh inpuahchah ṭhain ṭan la zel se, kan House zahawmna pawh vawn nun zel ni tawh rawh se.