Mizoram mau ni lo

Assembly Budget Session neih zawh takah Chief Minister chuan Mizorama mau awm sâ ang chin an tum loh thu a sawi a, Mizoin mau an tih ang chu banrêk tiat lek lek a nih thu sawiin, "A lian páwl pawh ban puam tiat a ni a, mi pakhatin pum 10-15 put theih a ni. Chu ai chuan raw lian chi, pum khat pawh mi pathum deuh thawin put ngai chìn kan tum. A inhlâwk hleih em mai. Hmànlai Mizo ar aiin broiler leh layer-te sumdawnna tak tak atan chuan kan duh zawk angin," a ti a; Mizoramah mau a tam tih ngawt chi a ni lo nia sawiin, "Kawng bula mi an la zo a, lui ruama mi put a ngai," a ti a, Mizorama industry-te chu raw material awm loh avangin an din ṭhup thu a sawi. 

Kan sorkar flagship prog­ramme chu raw chin a nih chu kan Chief Minister hian a lo sawi tawh a, rua/ mau hmanga Mizoram dinhmun siam ṭhat a tum. Chief minister chuan Mizoram state sorkar anga mau buaipui state dang an la awm ve loh thu a sawi a, entawn tur pawh an la awm lo niin a sawi.

Kan sorkar hian a term laihawl a hmang chho ṭan dâwn tawh a, tunah hian mau/ rua chin tur ka thlang ṭan chauh niin a lang a, engtikah nge hlawk khawpa kalpui theih a nih dâwn hriat a ni lo. State dang pawhin an la tih ngai loh tih kan tum a, entawn tur pawh an awm mumal lo a, indap chawpin state danga mau/rua kan lalut dâwn a, chu chu a hralhna kan la zawng leh dâwn niin a lang. He thil hi chu thui tak thlir thiam mi tán lo chuan tuipui a har dawn khawp mai. 

Kan ramah mau a tam em em a, chin chawp pawh ngai loin a ṭha duh a, kan ramhnuaite chu mau hmun tia sawi theih a ni deuh vek a; nimahsela heng maute hi chu hralh sumah a hlawk loh avangin sorkarin a aia hlawk zawka kalpui a tum mêk. Mizoram mau/ rua ni lo hlawk zawka chin theih nia kan state hruaituten an sawi chu a chi kan lalut chawp ang a, kan phun puitling ang a, chumi hnuah a hman ṭangkai dan leh a hralh dan zawn a ni dâwn a, chumi hmang chuan kan state economy hi siam ṭhat a ni zui dâwn a, nghah peih deuh chu a ngai dawn a ni.