Mipui kuta rorelna

West Lungdar naupang kum 13 mi rukbo nia thuthang awm chu Home minister-in tun hnai khan Assembly session-ah a sawi fiah a, hemi chungchanga thil thleng chu vanduaithlak a tih thu a sawi. 

West Lungdara mipa naupang pakhat rukbo thuthang avang hian a rubotu ni ngeia hriat hnam dang mi pathum chu khawtlang mipuiin an man a, an lirthei hal a nih bakah an thil zawrhte pawh an chân zui a; amaherawhchu police lamin Mizo­rama an lo luh dan leh an kalkawngte an chhui danin heng hnam dang pathumte hi naupang rubotu an nih a rinawm lo. 

He thil thlengah hian khaw­tlang mipui hian hnam dang mi pathumte hi naupang rubotu ni ngeia an hriat avangin kut an thlak a, a naupang berin a rubotute nia a sawi miau avangin an thinrim an che ta chiam a nih hmel. Misual zawng tura khawtlang an che chhuak ṭhin hi thil lawmawm tak a nih rualin roreltu ṭha an awm loh chuan duh baka chet mai a awl a, he thil thleng pawh hi a vanduaithlak takzet a ni. 

Hetihlai hian he thil thleng tipunluntu lian tak chu social media lama chak taka thu thehdarhtute hi an ni. Tunah chuan mi tin ban phakin an kutah media a awm ta a, he media chhuak thar social media hi ṭangkai taka hman theih a nih rualin pawi khawih theihna khawp hial a ni tel bawk a, tun ṭum thil thleng aṭang hian inzir fing ila, finfiah loh thil pawi theia thu thehdarh chiamtute hian mawh an phur tel tih pawh inhria se a ṭha hle.

Engpawhnise khawtlang mipui kuta rorelna a awm tawh chuan ngaihtuahna a fîm tawk lo fo a, dan anga thil kalpui hi kan zir chhoh zel a ṭul takzet a ni.