Mizoram tui a hal e

World Water Day chu Mizoramah pawh hman niin PHE changtu dy. chief minister Tawnluia chuan Aizawl khawpui chawmtu tura tui pump-na chuan khawpuia mihring pung zel a chawm thei meuh tawh lo tih a sawi a. Tanhril lamah Tlawng lui aṭanga tui pump-na khawl lian zawk bun hna thawh mek a nih thu a sawi a, tuikhur leh tuihna awm sa humhalh a pawimawh thu a sawi bawk. 
Kumin World Water Day thupuiah 'Tui ngaihhlut' tih hman a ni a, tunlai Mizoram dinhmun nen a inhmeh hle. Mizoram hi ruah tui dawng ṭha tak ram kan ni a, a dah khawlna lam hi ngaihsak tlang ila chu ṭhalah pawh buai lutuk tur kan niin a lang lo a; hei bakah hian kan tuihnate hi humhalh ṭha ila chu ṭhalah pawh mipui nuai 10 bawr vel chawm zo tur tui hi chu nei thei reng tur kan nih hmel hle. 
Tunah hi chuan kan ram kan vat chereu zo tawh a, he mi piah lamah hian tuihna humhalh nachang kan lo hre lo rei bawk nen, kan tlai lek lek tawh a ni. Ruah tui tlak tamna ramah tui nei loin kan buai a, kan tuikhur tam tak a kang chat tawh a, lui te deuhte phei chu ṭhalah a kang chu a ni ta deuh der mai a, ṭan kan lak thar a ngai takzet a ni.
Tunah hian Aizawl khawpuiah pawisa nei tan pawh tui lei tur a awm mumal lo a, tuikhur awm chhun chhunte a lun hle a, khawpui chhung hmun tam takah tui neih loh vangin mipui an buai a, thingtlang hmun dangah pawh chuti tho a ni. 
A chhia zawng zawng hi sorkar mawhpuh mai a awl a, sorkarin tui hnianghnar min pe thei lo a nih pawhin a nei thei chin chuan tui dah khawlna lei/siam kawngah kumin fur chhung hian ṭan la thar ila, kan veng leh khaw rama tuihna awmte humhalhin ṭan i la thar teh ang u.