Airport cheina sum leh pai

Lengpui Airport chei ṭhatna atan Mizoram sorkar chuan tun hnaiah cheng vaibelchhe 73 a seng. Airport chei ṭhat hna hi ṭhuang thuma kalpui a ni a, a hmasa berah cheng vaibelchhe 30.41 hman a ni a, a thawh hnihnaah cheng vaibelchhe 19.59 hman a ni a, a thawh thumnaah cheng vaibelchhe 23 sen a ni. 

Tuna Mizoram sorkar vawn fung chelh mektute hian airport hi an ngai pawimawh hle tih chu a chei ṭhatna atana an pawisa sen zatah mai ni lo chief minister berin a tlawh zatah pawh a hmuh theih. Chief minister meuhin hnathawhna hmun ngai a tlawh nawn tlut tlut hi a tam lo a, Covid-19 hri leng avanga inkharkhip lai pawhin a tlawh ṭhin a ni. 

Khawvel hmasawn zelah inkal pawhna changtlung neih a pawimawh a, chumi zinga pawimawh ber pakhat chu thlawhtheihna hmanga inkalpawhna leh thlawhtheihna ṭum hmun neih hi a ni. Kan airport neih chhun hi tih­changtlun a ngai a, mipui ṭhutna leh a hmunhma hrim hrim pawh hi a hluiin a chhe tawh a, state dang airport-te nena khaikhin chuan chei ṭhat hi a hun tawh reng a ni. 

Nimahsela thlawhtheihna ṭum harsa khawpin a chhe ta tih pawh la ni lo chei ṭhatna atana sorkar sum sen zat en hi chuan, sor­kar hian thil dang­ah sum harsat hi chhuanlamah a hmang thiang tawh kher lo ang. Airport hian chei ṭhat a mamawh a nih pawh­in sum harsat zual lai hi chuan chei ṭhat a mamawhna zualpui bika kutthlak a tawk viau ang a, cheng vaibelchhe 73 sen ral tur sorkarin sum a nei a nih chuan, thil dangah pawisa nei lo tia sawi pawh a inhmeh vak tawh awm lo e. 

Engpawhnise airport ṭha leh changtlung zawk neih hi chu state pakhat ve riang ruang tan chuan a ṭul takzet a ni.