Mipui inrin lawk a ṭha ang

Mizoram sorkar chuan Joint Electricity Regulatory Commission (JERC) for Mizoram & Manipur hnenah kum 2021-2022 atan electric bill 42% a tihsan a rawt. Hetihlai hian tun hnaia Chief Minister hoa Mizoram Road Fund Board ṭhutkhawmnaah kawngpui enkawlna atan road cess lâk a pawimawh thu sawi lan a ni. 

Assembly Budget Session neih zawh takah khan sorkar hotute chuan mipui phurrit tura chhiah lâk belh an tum loh thu an sawi a, chutih rualin chhiah lâk dan kalphung ṭha zawk leh a khawn dan felfai zawka kalpui a, pawisa tam zawk lâk luh dan tur duan an tum thu an sawi lang. Mizoram sorkarin mipui nghawng thei tur sum leh pai khawn belhnâ lam hawi kalpui a tum thu a lo lang chho a, hei hi mipuiin an hriat reng a pawimawh. 

Mizoram sorkarin kum khat chhunga a hman tur budget a pharh ta a, sum awm dan en hian mipui chan tur leh hmasawnna hna thawhna tur pawisa a awm dâwn mang lo niin a lang a, pawisa tam ber hi chu sorkar hnathawk hlawh a kal tur leh sorkar inrelbawlna atana hman ral tur a ni. 

Mizoram sorkar hian kan ram hi tluang taka kalpui zel a tum dâwn a nih chuan sum lakluhna tur a ngaihtuah a ṭul a, sum lakluhna tur erawh a vang hle a ni. Mipui aṭanga chhiah a khawn a nih leh mai loh chuan sum thawk chhuak thei hmalakna a awm mang si lo a, kan state hmabak hi a thim hle ti pawhin a sawi theih hial ang. 

Sorkarin hmalak a tumna pahnih lo lang chu mipui aṭanga sum leh pai khawn belh zawngin a ni tih a lang ta a, electric bill lâk dan tura Mizoram sorkar rawtna hi tlang ta ngat se chu tuna kan chawi zat lêt deuhthaw chawi a ngai ang. Road cess chungchang sawi lan awm hi a kalpui dan tur la hriat loh mah se, hetiang thilin a tawpa in-direct taka a nghawng chu miretheite bawk an ni duh khawp mai. 

Mizoram sum dinhmun a ṭhat loh thu sawi ṭhin a ni a, sum han lakluh belhna mai tur sorkar hian a ruahman a nih loh chuan sum hmuhna atana sorkar hmalakna tuartu tur chu mipui bawk kan nih zel dawn niin a lang. Hei vang hian Mizoram mipuite kan lo inrin lawk hi a fuh hle ang.