Congress-in an dem MNF-in an chhan

Congress chuan thuchhuah siamin Mizoram Assembly Speaker chu March 22-a PWD hotute bula inhrosaa silai lek chhuakah an puh a, "Silai meuh lek chhuak a, sorkar officer-te a rikrap hian sorkar hnathawkte a zah lohzia a tarlang chiang hle. A chet dan hi dan bawhchhiatna dik tak a ni," an ti. MNF chuan thuchhuah siam zuiin, "Sorkar hmun hlu tak sorkar hnathawkten a tichhe zawnga kut an thlak Assembly Speaker-in a humhalh ngam hi chhuanawm kan ti a, huaisen pawh kan ti hle," an ti ve thung.
Mipui nawlpuiin kan hriat si lohin tun hnaiah Speaker bangla bulah thil thleng a awm ngei niin a lang a, chutah chuan Assembly Speaker pawh hi a inrawlh ngei niin a lang. Eptu lam chuan Speaker hi sorkar hnathawk PWD hotu lu ber berte ko khawma silai hmanga rikrapah an puh a, mipui lam chuan eng thil nge thleng kan hre thei lo a, Congress thuchhuah hi a tak nge thu phuahchawp tih pawh thil hriatthiam harsa tak a ni. 
Hetihlai hian MNF chuan Speaker bangla bulah hian thil thleng a awm ngei tih nem­nghehna anga puh theih turin thuchhuah an rawn siam ve vat a. Speaker chu Mizoram hmun hlu humhimtu tiin an rawn chhuah ta thung a, "Mizoram tana hmun hlu humhalh ṭul a tih mai bakah, speaker zahawmna humhim a ṭul bawka a hriat avangin, officer-te hi koin na takin a sawi ta a ni," an ti a; Speaker hian eng thil nge na taka a sawi a, eng chiah hi nge humhalh a tum tih hi mipui lamin an hre châk tawh hle ang.
Politics-ah chuan thu inchuh a awm ṭhin a, mipui tan thu dik hriat a harsa ṭhin hle. Tuna Speaker ni ta hi Congress hunlaia Health Minister a nihlaiin MNF lam zawkin kohhran, khawtlang leh ram duh loh thila in­hnamhnawihah na takin an lo puh tawh a; a hunlaia a awmna party Congress lamin MNF puhna laka a fihlimzia an sawi ve thung a, he inpuhna hi a dik leh dik loh finfiahna awm loin a reh zui ta a ni ber mai. 
Tun ṭuma thil thlengah pawh hian Congress lam chuan sorkar hnathawkte silai nena vautu tiin Speaker hi an dem a, MNF-in sorkar hmun pawimawh humhalhtu tiin an chhuang thung - mipui tan rin zawk tur leh rin loh zawk tur hriatthiam a har hle a ni.