PAHOSS

Lunglei District High Powered Committee chairman chuan Lunglei khawpuiah lirthei dahna tur Parking House Support Scheme (PAHOSS) hnuaiah cheng nuai 400 dah a nih thu a sawi. Aizawl khawpuiah PAHOSS hnuaia ṭanpuina dawngtu tur mi 403 thlan an ni tawh a, kum 2020 September-ah khan cheng nuai 6,171 pek chhuah a ni tawh a ni.

Khawpuia traffic jam tihziaawmna tura pawisa rua­hman zat hi a ṭha­hnem hle mai a, sorkarin sum a dah zawng zawng phei chu Mizoram sorkar sum neih loh dan aṭanga teh chuan a tam tham takzet a ni. Hengte hi mi hausa, kawngpui kama in hmun nei chinin an dawn tur a ni deuh ber a, chutiang nei ve lo tan chuan dawn theih loh tluk a ni. 

Thil danglam deuh erawh chu Aizawl khawpuia kawngpui lûn tak ni lem lo, hmun fâl deuh deuhah pawh PAHOSS aṭanga ṭanpuina sum cheng nuai tam tak dawng an awm nawlh nawlh a, khawpuia traffic jam tihziaawmna tura sum dah sorkarin a hman dan hi mipuiin mak an ti sawt hle a ni. 

Aizawlah hian lirthei nei thar turin garage an neih zel a ngai tawh a, garage nei lo tan lirthei a neih theih tawh lohlaia lirthei dahna tur atana sorkarin sum heti zat a sen a la ṭul zel hi thil inkawkalh angreng tak a ni. Sorkar hausa leh sum nei chu ni ila khawpuia lirthei dahna in sak belh zel hi duhthusam chu a ni ngei a; nimahsela kan sorkarin mamawh leh thil ṭulah pawh sum a neih mang lohlaia PAHOSS-a sum a sem chhuah dan hi chu ngaihtuah ngun ngai tak a tling.