Autonomous District Council

Chakma Autonomous District Council (CADC)-a BJP MDC parukte chuan tun hnai khan MNF an zawm a, CADC-ah MNF chuan member 18 an nei ta a ni. Hetihlai hian CADC-a Chief Executive Member ni lai chu a bang a, CEM thar lakluh nghal a ni bawk.

Mizoram chhim lama Auto­nomous District Council (ADC) pathum - Mara ADC, Lai ADC leh Chakma ADC-te hi an huam chhunga rorelna sang tak chelhtu an ni a, an huam chhung tan an dinhmun a pawimawh hle. Sum ṭhahnem tak leh an huam chhung mipuite enkawltu an ni a, hna an thawh ṭhat chuan hma­sawnna keng thei khawp sum leh pai pawh an kawl a ni.

ADC sorkarna hi a nghet lo thei hle mai a, MDC-te hian an hawi lam an thlak lual fo a ni. State sorkarah rorelna vawn fung chelhtu an inthlak rual deuhthawin ADC lama roreltute pawh an inthlak ṭhin a, MDC-te hi thlan tlin an nih hnuah anmahni thlang tlingtu mipuite hawi loh lamah an duh chuan an insawn thei mai zel a, "Inthlan a zawh hnuah inthlanna pawimawh zawk a inṭan e," an tih fiamthu ṭhin ang maiin ADC hi an lo awm tawh ṭhin a ni.

Congress hunlai pawhin ADC-ah hian rorelna inchuhin MDC-te an lo insawn kual tawh ṭhin a, ṭawngkam danga dah dawn chuan 'MDC inruksak' ti pawhin a dah theih ang a; term khat chhungin ADC-a rorelna hi vawi hnih vawi thum a inthlak changte pawh a lo awm tawh ṭhin a ni. ADC-ah hi chuan anti defection law-in an MDC-te a phuar ve loh avangin an insawn kual thei tiin a sawi theih a, hei hian a nghawng erawh chu a huam chhung hmasawnna hna kal tluang lo ṭhin hi a ni awm e.

Tunah chuan state sorkarah MNF-in ro an rel a, BJP ticket-a thlan tlin MDC ṭhen­­khat chuan anmah­ni thlang tlingtu mipuite hawi loh lam panin MNF an zawm ta a, hei hi ADC-ah chuan thil thar a ni lo. Chutih rualin ADC huam chhunga mipuite hi an MDC-te chungah an thikthu a chhiat loh a, an MDC-te'n thlan tlin an nih hnuah an duh lam lam an hawi kual thei zel a nih chuan ADC huam chhung hmasawnnain a tuar zel thei tih an hriat a ngai a; an zawm thar political party chu tu pawh lo ni se, thlan tlin an nihna party kalsana hmun danga an pêm kual fo hian ADC huam chhung hmasawnna hi thui tak a nghawng a, a tawpa tuartu chu mipui bawk an ni ang.