Sorkar website enkawl

Information & Communi­cation Technology (ICT) department chuan tun hnai khan 'Government Website Excellence Award, 2020' an sem a, website enkawl ṭha berah Information & Public Relations department thlan a ni. ICT department hian tun dinhmunah sorkar, institution, society-te website 336 a host mek a, website atana mamawh - domain, hosting leh CMS-te a thlawnin a pe mek a, sorkar department-te'n anmahni website ṭha taka an enkawl theih nan training an kalpui mek bawk.

Mizoramah hian sorkar department zingah website nei lo an awm tawh mang lo ang a; nimahsela mumal taka website enkawl hi an tam lo hle. Department ṭhenkhat chu an hnathawhin a zir avang pawh a ni ang a, nitin maia website-a thil thar dah lut ṭhin an awm a, department ṭhenkhat ve thung chu an website siam tirha mi bak la khawih che leh mang lote an ni nawk ang.

Sorkar department website hi uluk taka vil leh enkawl chu ni ngat se tun aia a let tam taka ṭangkaia hman theih a ni a, a department mai bakah mipui hi a hlawkna teltu tur an ni ang. Website-ah hian department chanchin kimchang, an hnathawh, an hnuaia mipui hriat tur pawimawh, hna awm ang angte leh an zarzo theih thilte thlengin kimchang taka dah theih ni se a lawmawm ang a, department pakhat ve riang ruang tan website viltu dah leh inzir belh hi thil harsa a ni lo ang.

Sorkar depart­ment website a nih angin duhthusamah chuan Sap ṭawnga (English) thu dah ni tel thei ṭhin se, hnam dang leh state pawn aṭanga kan sorkar hmel lanna ber pakhat a nih ṭhin avangin hei hi ngaih pawimawh ni se a lawmawm ngawt ang.

ICT department-in sorkar website enkawl ṭha lawmman an siam hi a lawmawm a, hei hian department inkarah inelna thianghlim siam se, he mi lama department muthlute kai harh bawk rawh se.