Aizawl tihsual tawh Lungleiin pumpelh se

Lunglei High Powered Committee vice chairman chuan Lunglei khawpuiah bawlh­hlawh ṭawih thei leh thei loa thliar kalpui a nih tur thu a sawi a; Lunglei khawpui huam chhunga VC 24 zinga pakuaah UDPA department-in bawlhhlawh an khawn ang a, VC 15-ah YMA lamin an khawn ve thung dawn a ni.

Lunglei khawpui­ah awmze neia bawlh­­hlawh thliar a ni tur hi a lawmawm a, hei hian khawpui thianghlimna leh hriselna kawngah te, bawlhhlawh paih tawh ṭangkai zawka hman kawngahte leh thil dangah a ṭha zawkin nghawng a nei ngei ang. Hetihlai hian bawlhhlawh thliar kalpui dan hi a fel loh palh chuan Aizawl khawpui bawlhhlawh paih khawmna ang mai a ni ve palh thei a, a tir aṭanga theihtawp chhuaha vil a ṭul ang.

Zep thu a chêng lo a, tun hnaia Aizawl Municipal Corporation inthlan dawna thu inchuh lian tak pakhat chu bawlhhlawh paih dan chungchang a ni. Eptu lam chuan AMC vawnfung chelhtute chu bawlhhlawh paih dana mipuite phurrit siamsak a, a taka bawlhhlawh sawngbawl dan kalpui mumal leh si loah an puh a, bawlhhlawh paihna hmunte tlawhin ṭawih thei leh ṭawih thei lote pawh an la paih pawlh mai mai tih an fianfiah niin an sawi.

Tun thleng hian Aizawl khawpui bawlh­hlawh paih khawmna ber hi an la inchingfel hleithei lo niin a lang a, Assembly budget session hnu­hnung berah pawh sawi chhuah a la ni. Hei hian Aizawl khawpui tana a thua bawlhlawh paih dan duan chu a taka kalpui kawngah thuneitu lamin an hna an tlin tawk lo tih a tilang chiang a, inpeih kim hmaa hmalakna bul ṭan pawh an ang lek lek mai.

Lunglei khawpuiin bawlh­hlawh a thliar ve ṭan ta hi a lawm­awm a, anni hi chuan Aizawl ang lo takin in lama an thliar hi a paihna hmunah pawh lo thliar fel se, awmze nei takin bawlhlawh sawngbawl hna hi kalpui ngei rawh se.