Social media hman fimkhur hun a ni

Tunlaiin Mizoram chhunga Assam lamin ram an rawn chuh avang leh Mizoram chhungah pawi an rawn khawih avangin state pahnih inkar boruak a ṭha vak lo a. Hetihlai hian social media-ah ramri buaina chungchang leh a kaihhnawih hi hmuh tur a tam a; a chhe ber thleng thei laka invenna tura Mizoram lam inbuatsaihnate thlenga theh darh a ni. 

Tun hma chuan chanchin thar kan tih mai hi chu a puangtu turte'n an puang mai ṭhin a, radio, chanchinbu leh television lama chanchin thar lak khawm leh thehdarh kawnga hemi lama eizawngtute hna a ni ṭhin. Heng mite zingah hian he lama hnathawh dan a zira zir an awm a, ṭhenkhat chu an eizawnna a nih avangin tawnhriat nei ṭha tak takte an ni. Mipui hriata puanzar tur chin leh thupa ṭha zawk thlengin an thliar ṭhin. 

Tunah erawh chuan social media a lo chhuak tawh a, internet connection kan nei ṭha ve thawkhat ta bawk nen mitin mai hi thu thar thehdarhtu kan ni ta vek mai a, a hmu hmasa, hre hmasa leh theh darh hmasa­tu nih kan inchuh a ang ta hle. Hei hi khawvel inher danglam chhoh dan a nih miau avangin indem leh insawisel hleihtheih pawh a ni lo a, a chenpui dan kan thiam a, kan hmanraw neih ang hman thiam kan zir erawh a ṭul ta takzet mai. 

Tunah hian duh thuhmun leh duh loh thuhmun neiin Mizo mipuite kan awm mek a, ṭawngkam duhtui lo zawnga sawi dawn phei chuan 'do thuhmun nei' ang hial pawhin a sawi theih ang. Hetihlai hian a lehlama mite'n an hriatthiam theih tura kan tana ṭha lo thu leh thlalak thehdarh zung zung te, kan hriat ang apiang puanzar chak lutukte hi thil pawi thei a ni. 

Social media hmang fimkhur tura infuihna hi infuihna awmze nei lo a ni fo a, inven leh indan hleihtheih a ni ngai lo a; nimahsela Mizoram hun tawn mek thlir hian mipui nawlpui hian social media hi kan hman fimkhur a ṭul a, a bik takin ramri hrula chengte leh thil thlenna hmun tlawhtute'n puanzar leh thup tur chin kan thliar thiam a ṭul takzet a ni.