Tualṭo vaimim versus mau chi lakluh

Agriculture minister chuan Mizorama tualṭo vaimím, state variety atana puan - mímpui chi khat leh puakzo chi khatte chu tun hnai khan a tlangzarh a, hengte hi loneitute chìn turin pek chhuah a ni ang.

Mizoram tualchhuak vaimím thlan chhuahna tur hian ICAR, Kolasib leh Agriculture department-te'n Mizoram hmun hrang hrang aṭangin vaimin chi hrang 70 chuang an la khawm a; ICAR, Kolasib leh Mizoram KVK hrang hrangte kaltlangin vaimin zinga danglam bikna nei, thar hlâwk tur, natna leh rannung laka him bikte thlan a ni.

Agriculture de­part­ment-in Mizo­ram chhunga a lian thama chin atan Mizorama tualṭo vaimim ngei mai an thlang chhuak hi a lawmawm a, a thlan dan kalphung pawh fel takin an nei sa a, mithiamten Mizoram chhunga ṭha duh tur chiang sâ an thlan chhuah a ni. Heng vaimimte hi Mizoram chhungah a ṭha duh a ni tih an finfiah tawh sâ a ni a, hei vang hian a hlawma chin a ngamawm mai ni loin a phurawm hle ang.

Hetihlai hian Horticulture department lamin sorkar flagship programme hnuaia mau/ rua chin tur an thlan dan erawh Agriculture department lam rin dan nen chuan a inang lo hle. Mizoram chhunga mithiam kan neihten ngun taka an zir chian thu hriat a ni lo a, Mizoram chhunga mau/ rua awm sâ chu chin tur a nih loh thu kan Chief Minister ber leh Horticulture department enkawl­tu chuan a sawi tawh. Hei mai hi a la ni lo a, Mizoram chhunga chin tura thlan brandissi leh latiflorus-te hi Mizorama tualṭo an nih loh mai bakah National Bamboo Mission-in mau chi chin tur a sawi zinga tel lo an ni a; heng thilte hi zirchianna awm mumal loin mipui pawisa hmangin chin a ni dâwn ta a, hlawh tling ngei se a lawmawm dâwn a, a hlawhtling lo palh a nih chuan mipuiin kawh tur an nei chiang sâ ngei ang.

Engpawhnise Mizorama Agriculture leh Horticulture department-te thil kalpui dan hi a inang lo mai ni loin a inpersan hle mai a, kalphung mumal zawk neih theih hlan a nghahhlelhawm khawp mai.