Kawngpui siam hun ṭha

Mizoramah fûr ruahtui a tlak tam avang leh a tlak hun chhung a rei avangin kawngpui siamna hun remchang a tlem ṭhin a, PWD pawhin hei hi kawngpui chhiat chhanah an ngai. Ṭhal khaw ro a ni chho ṭan ta a, Mizo­ram sorkar tan kawngpui siamna hun remchang ṭha a awm ta.

Kan ram buaina lian tak chu inkalpawhna kawngpui ṭha lo hi a ni. Khaw kilkhawr deuhte chu sawi loh, kan châk lâkna ber Silchar leh Aizawl inkar kawngpui pawh a ṭha hlei thei lo a, chumi avang chuan truck driver-te pawh an lo nuar hial tawh a ni. Chutih laiin, nikumah khan he kawngpui hi nasa takin a min a, fur lai a nih bawk avangin sorkar lam tan pawh siam zung zung a harsa tih kan hmu. Nimahsela, an nawrh meuh kha chuan kar loah sorkar lamin kawngpui chhe zual lai an hnawh khat zung zung a, a bumboh deuhte an timâm zung zung a nih kha.

Tunah chuan ṭhâl a ni ta a, kawngpui siamna hun ṭha tak a inher chhuak tawh. Mizoram sorkar hi kawngpui ṭha ngai pawimawhtu an ni a, hei hi an auhla tak pakhat pawh a ni bawk a; tun ṭhâl chhung hian kawngpui  ṭha zawk kan neih theihna turin hma an la thei turah ngai ila, mipui pawhin hei hi an beisei dan a ni ang.

Kan chief minister sawi angin, nikum lamah chuan hna thawk tak tak thei turin hmanrua an indaih lo a, hun an la nei lo bawk a; tunah chuan hmanraw ṭha lei tur leh hna thawk turin hun an nei ta a, Mizoram mipuiin beiseina sang tak nena an thlan tlin kan sorkar hian a mipuite tan kawngpui ṭha hi siam thei se a duhawm khawp mai.

Politics-ah chuan dik zawk leh ṭha zawk nih inchuh a na ṭhin, inhnial leh insawisel a bâng thei lo. Chutih laiin, mipui nâwlpui hi chu êng ṭha tak min pe a, damloh nikhuaa inenkawlna ṭha min pe a, tui hnianghnâr min pe theitu leh kawngpui ṭha tak min pe theitu sorkar kan neih chuan kan lung a awi ngei ang.