Vawk thih chhan endik ran a ngai

Lungsen, Lunglei district-ah tun hnaiah vawk pûl hri a leng a, vawk 90 chuang an thi tawh. Sorkar mithiamte'n vawk thih chhan hi an chhui mek a, tun thleng hian eng vanga thi nge an nih finfiah theih a la ni lo.

Mizoramah vawk pul hri a khat tawkin a leng ṭhin a, heng vawk pul hri hi a reh ve leh mai ṭhin a, chutih rualin a khat tawkin khawi hmun hmunah emaw hian vawk pul hri hi a leng deuh reng a ni. Vawk pul hri len chhan hi hriat fiah mang loha lo reh ve leh maite a awm a, eng hri ber nge a nih finfiah lohte a awm ṭhin.

Tun hnaiah vawk vulh lamah sorkarin ṭan a la nasa a, mimal pawhin eizawnna ṭha a ni tih hriain vawk vulh lamah ṭan an la nasa hle. Thingtlang lamin eizawnna tak taka an hman piah lamah khawpui lama mihausa zawkte pawhin a hlawm lianin vawk hi an vulh nasa chho ṭan hle a ni.

Mizote sa ngainat ber chu vawksa a ni mai thei a, khawpui hmun ṭhenkhatah phei chuan kilogram khat hi Rs 450-in an hralh tawh a, hei hian eizawnna ṭha tak a ni tawh tih a tichiang a; vawk note chi ṭha deuh phei chu Rs 7,000 leh a aia toin an hralh hial tawh bawk a ni.

Hetiang a nihlai taka vawk pul hri a leng hi a pawi a, hei hian nghawng ṭha lo tak a nei chhunzawm ang tih a hlauhawm avangin sorkar lam leh mithiamte'n ṭan an lak ran a ngai ta a ni. Inven dan thiam tur pawhin a natna hriat chhuah hmasak hi thil pawimawh a ni a, theihtawp chhuahin ṭan la se, Mizoram hmun danga a darh tur ven theih dan zawng chungin sorkarin ṭan la zel rawh se.