Sorkar leh ruihhlo do
Central YMA ruihhlo man an hal ralnaa thusawitu CYMA president chuan, ruihhlo do kawngah sorkar chêt dan an duhkhawp loh avangin YMA-in hma an la leh tih a sawi a; kum 2019-a North Vanlaiphaia YMA General Conference-ah kumpuan atan 'Zirna uar' an thlan thu sawiin, "Chuvangin ruihhlo do chu chawlhsan rihin, sorkar lam rinráwlah neih a ni. Amaherawhchu, ruihhlo avanga ṭhalai tam tak tun hnaiah an thih leh tâk avangin YMA CEC chuan ni thei ngangin a hre lo a, kan ram dinhmun zir chiangin, ruihhlo do a rêl ta a ni ber," a ti.
Mizoramah ruihhlo a hluar leh ta hle mai a, ruihhlo kaihhnawiha nunna chân pawh an pung leh ta hle. Hei hi sorkarin a thlir liam mai a nih chuan kan hmabakah hian ṭhalai nunna tam zawk hi kan chân zel ang tih a hlauhawm a, tun anga ruihhlo zalenna rama dah tawp hi chu sorkar ṭha tih tur a ni lo.
Zêp thu a cheng lo, ruihhlo chang ni loin zu pawh a tam. Aizawl khawpuiah chuan a duh tan zu chi hrang hrang lei tur a awm reng a, a man a to deuh tih mai a ni. Khawpui daiah mai 'zu hmun' tih tur khawpa zalen taka zu an zawrhna a awm reng a, heng zu hmunpui leh a chhehvela an zu bilhna lam vai leh endik lam aiin Mizo ṭhalaite zu lei sâ chu an haw kawngah Police leh Excise lamin an lo dap ṭhin a, sorkar zu do dan pawh hi ennawn a ṭha hle.
Khawpui mai ni lo thingtlang thlengin ruihhlo a hluar a, ruihtheih chi hrang hrang hmuh tur a awm reng mai hi a pawi hle. Hengte hi sorkar chakna hmang ringawta do hneh theih a ni lo mai thei a, tlawmngai pawlte nena thawkhoa inlungruala do chi chu a ni ngei ang. Nimahsela sorkar aṭanga ruihhlo do tura hlawh neia rawih tam tham tak an awm chunga ruihhlo hluar dan en hi chuan, sorkar thuneitute aṭang hian tih tak taka ruihhlo do tumna a awm lo a ang ṭhin khawp mai.
Khawpui kawtthlerah ruihhlo an hralh ngam a, ruihhloa inchiu turin ualau takin an che ngam tawh bawk a, zu ni se mobile phone anga koh theihin kil tinah an awm emaw tih mai tur a ni leh ta.
Hei hi sorkar hian mualphona a ni tih pawm ngam se, ruihhlo ngaite enkawlna in siamna tura sum dil chhuah tluka pawimawh chu ruihhlo do tura a taka pen chhuah a ni tih hria se, Mizoramah hian tih takzetin sorkar hian ruihhlo do tawh rawh se.