Inthlan rilru dahṭhaa rorel

AMC Ward-VIII bialtu coun­cillor chuan, a bial chhunga veng pathum - Armed Veng, Armed Veng South leh Chite Veng local council hruaitute a kâwmnaah, an ward hma­sawnna atana theihtawp chhuahpuiah sáwmin, "Inthlan a zo tawh a, party rilru dahṭhain, kan khawtlang hmasawnna i ngaihtuah ang u," a ti.

Mizoramah hian 'ruling bial' tih leh 'opposition bial' tih hi kan sawi hrang nasa ṭhin a, kan politician-te'n ruling bial ni lo an ro bik turzia leh ruling bial an nih loha an tana a ṭhat loh turzia an sawi a, ruling bial an nihlawh bik dan turte an sawi nasa ṭhin hle a ni.

Ruling bial leh opposition bial kan en hran chhan lian tak pakhat chu inthlan rilru dahṭha loa rorelna kan kalpui ṭhin vang a ni ber a, hei hi rorelna fel lo tak a ni. Inthlan dawn chuan mipuiah kan inzuar vek a, mipuiin an duh ang mi an huam chhunga rorel turin an thlang a, an thlan chhuah chu tu pawh ni se rorelna kalpui a nih tawh hnuah chuan inthlan dawna rilru put hmang thlaka mipui tana rawngbawl chu hnaa neih mai tur a ni tawh ang.

Tun hnaiah Serchhip-ah by-election a awm dawn a, Mizoram sorkara Minister ṭhenkhat thusawi duh dan en hian Mizoram an hmangaih lo hle tia puh theih turin thu an sawi a, a pawi hle a ni. Ram rorel tura thlan tlin tawh, Mizoram sorkara Minister meuh ni tawhte'n Serchhip bial chhunga mite chu an mipuite anga pawm duh mang lo ang maia an party mi leh sa an thlan tlin loh chuan en hran hnial lo ang maia vauna ang rawngkaia puh theih ṭawngkam an la chhak chhuak duh hi a vanduaithlak hle.

Engpawhnise, "Inthlan a zo tawh a, party rilru dahṭhain, kan khawtlang hmasawnna i ngaihtuah ang u," tih hi kan politician-te rilru put hmang ni se, inthlan rilru dahṭhaa rorelna kalpui hi a pawimawh takzet a ni.