District 12-na tur?

Tlabung District Demand Committee chu Tlabung district a pian theihna atan ke an pen ṭan a, a ṭula hman tur sum an khawn khawm ṭan a, Tlabung district a pian theihna turin theihtawp chhuahin hma an la zel dawn tih an hruaitute chuan an sawi. He Committee hi Tla­bunga village council, tlawmngai pawl leh political party hrang hrangte din a ni. 

Mizoramah mipui nuai 11 tling lo hret kan awm a, tunah hian district 11 a awm tawh. Sorkarin district thar a siam dawnin tehna hman a nei lem lo niin a lang a; mihring cheng zat (population) hmangin a teh lo tih chu district awm dan aṭangin a hmu theih. A awmna hmun leh zau zawng (location & area) chu tehfungah a hmang lo niin a lang bawk a, khaw pahnih khat lek leka inhlatah district hedquarters-te kan nei nawk mai. 

Tlem lai deuh khan Darlawn lamin hmar lam tana khaw pawimawh an nihzia leh, hmar tlang dungin an mamawh avanga district thar neih ngei an phû thu an sawi tawh a, nawr chhunzawm zel an tum. Tunah Tlabuang lamin district thar an neih ngei theihna turin ke an pen ṭan ve leh ta bawk a, an hmalakna hi tawp san mai loa beih chhunzawm zel an tum a ni. 

Sorkar tan pawh district thar beiseitute lo tihbeidawn emaw, a rem loh thu lo hrilh hi thil harsa tak a nih hmel a; chutihlaiin district thar beiseitu lamin tun hmaa district thar ngiattute kal dan thlir chungin hma an la chhunzawm zel ang. Hetianga district thar nawr tura rawn che chhuak an awm takah chuan, mipuiin Mizorama district thar 12-na tur a piang leh dawn nge dawn lo tih an inrinsiak chho leh dawn a ang ta hle.