Ruihhlo do leh enkawlna

Chief Minister chuan tun hnai khan ruihhlo ngaite enkawlna hmun, Jordan Centre chu Seṭhawnah a hawng. He hmun atan hian kum 2019-20 khan SEDP aṭangin cheng nuai 932.27 dah a ni a, a hmunhma thawm ṭhat a nih bakah hnathawktu mi 139 chuang lak belh an ni bawk.

Mizorama kan buaina lian tak pakhat chu ruihhlo avanga kan ṭhalai talbuai an tam ta lutuk hi a ni a, hei hi sorkar pawhin hriain ruihhlo ngai enkawlna hmun lian tak a buatsaih a, a lawmawm hle a ni. Hei hian kan ṭhalai ruihhlo avanga buai mi ṭhenkhatte a chhanchhuah theih beisei ila, kawng dik an zawh leh theihna tur hmun pawimawh lo ni rawh se.

Sorkarin sum tam tak senga ruihhlo ngaite enkawl­na hmun a buatsaih theih lai hian ruihhlo do kawngah chuan sorkar hian hna a thawk ṭha tawk lo tih chu phat rual a ni lo a; CYMA chuan ruihhlo do beihpui chawlhsana zirna uar lam kalpui an tum pawh inngaihtuah nawnin ruihhlo a hluar em avangin a do hna an thawk chhunzawm leh ta a, sorkar chu ruihhlo do kawnga a thawh ṭhat tawk loh thu vantlang hriatah an sawi lang ta hial a ni.

Khawvel hmun dangah ruihhlo do hna hi sorkarin a kalpui a nih loh chuan tlawmngai pawl leh khawtlang huapa an beih vakna hmun hi a awm a nih pawhin a tam lo mai thei a. Mipui nawlpuiin an thawhpui ṭhatna ber Mizoram chhunga ruihhlo do kawnga tlawmngai pawl­te'n sorkar an duhkhawp loh thu an sawi chhuak hi sorkar tan mualphona a ni hial awm e.

Sum tam tak senga ruih­hlo ngaite enkawlna saa hnathawktu lak belh a ni ang hian, sorkar hian ruihhlo do kawngah tun aia chak zawkin ke pen rawh se.