Mau/ Rua kan buaipui dan hi

Mizoram Chief Minister chuan mau/ rua chungchangah Delhi lam an hmin tawh tih a sawi a, a dawnthleng (head of account) lam buaipui a ngaih thu a sawi. Horticulture minister hian Mizo­rama industry din turin Dr N Barathi a sawm thu a sawi a, India ram state zingah Mizoram anga mau buaipui an la awm loh thu a sawi a, mi 100-in mau an phun chuan industry din a nih theih tur thu a sawi a, bamboo link road atan sum ṭhahnem tak kan dawn tur thu a sawi.

Horticulture de­part­ment enkawltupa ber, Finance depart­ment changtu ni bawk, kan state hotu­pa ber ni bawkin mau/ rua a buaipui avang hian kan state tan chuan buaipui loh theih a ni lo a, a hlawhtling a nih chuan amah leh sorkar an hmingṭha ang a, a hlawhtling lo palh a nih chuan, 'risk fuh loh' thil a thleng dawn tihna a nih hmel.

Mau/ rua hi kan Chief Minister hian Mizoram sorkar flagship programme a nih thu a sawi tawh a, keini anga a state-a buaipui hi an awm loh thu pawh a sawi tawh ṭhin. Hetihlai hian kan ṭhenawm Assam-ahte mai pawh hian Assam Industrial Development Corporation hnuaiah Bamboo Technology Park lian tak, cheng nuai 6,228 hmanga din an nei tawh a; North East Cane and Bamboo Technology Centre (NECBDC) hnuaiah Nagaland leh Manipur-ah 'hi-tech bamboo nursery' an kalpui mek a, NECBDC hian lian tham taka mau/ rua kalpui turin Jammu and Kashmir sorkar nen inremna an ziak bawk a ni.

India hi China dawta khawvela mau ngah ber ram a nih avangin state dangte pawh hian mau hi an buaipui ve ngeiin a rinawm a, keini anga a state anga buaipui an awm ve lo a nih pawhin keini aia lian thama buaipui hi chu an awm nual niin a lang. National Bamboo Mission hnuaia kum 2020-21 chhunga Mizoramin Rs 3,50,00,000 a dawn laia Tripura-in Rs 6,87,93,000 a dawng tawhte pawh hi an thikawm rum rum mai.

Engpawhnise state sorkarin thapui thawhin mau/ rua a buai­pui a, Delhi lam pawh an hmin tawh a, a dawnthleng buaipui zawh a nih hunah chuan kan state economy chawi kang thei tur khawp thil ṭha leh hlawk a nih i beisei ang.