Ngaihsak hlawh Lengpui Airport

Mizoram Chief Minister chuan April 9, 2021 khan lengpui Airport-a hnathawhte a hmunah a enfiah. Lengpui Airport hi Mizoram sorkar sum SEDP aṭang te, Special Central Assistance aṭang leh North Eastern Special Infrastructure Development Scheme aṭanga sum hmuh hmangin chei ṭhat mek a ni.

Mizoramin airport pakhat chiah kan nei a, hei hi kan hmang ṭangkaiin tunah chuan mihring zin veivahna hmun pawimawh ber ang hialin a chhal theih tawh ang. Airport hi siam a nihlaiin a sawiseltu lamin mi hausate pual angin puh deuh mah se, mi zawng zawng tana ṭangkai a ni tih a takin a lang zel a, airport ṭha tak neih hi state tan a ṭul hle a ni.

Lengpui Airport hian kawng hrang hrangah duhthu a sam lo hle mai a, hmun louma awm a ni chungin mipui hahchawlhna hmunah boruak tihdaihna pawh a awm mumal lo a, inthiarna hmunte a fai tawk loin kawng tam takah state ṭhenawm airport-te pawh a tluk lo hle a ni.

Sorkarin airport hi thuam ṭhat a tum a, remchang awm ang ang aṭagin sum a la khawm a, cheng vaibelchhe 73 chuang tehmeuhin a chei mek a, Aizawl Municipal Corporation kum khat budget zat thuaka chei ṭhat a nih bakah kan Chief Minister berin a khat tawkin a tlawh reng a, kan airport neih chhun hian ngaihsak a hlawh ṭha hle a ni.