A thlawna sem leh dawn

Urban Development and Poverty Alleviation (UDPA) department changtu deputy chief minister Tawnluia chuan, Parking House Support Scheme (PAHOSS) chu la kalpui zel a nih dawn thu a sawi a, "He scheme hi thil ṭha tak a ni a, a puitlin hunah chuan traffic jam eng emaw chen a chhâwk zângkhai dawn a ni. Mipui tan thil ṭha tak a ni a, loan pawh ni loin, a thlâwnin sum an dawng a ni," a ti a; a dawngtute'n ṭha taka an tihhlawhtlin ngei a beisei thu a sawi bawk.

Tunlaia sawi hlawh tak pakhat chu khawpuia traffic jam tihziaawmna tura mimal hminga sorkarin a thlawna parking siamna tur sum a pek chhuahna PAHOSS hi a ni. Mizorama khawpui lian, a bikin Aizawl khawpuiah lirthei a pung chak em em a, traffic a jam nasain hun leh sum a tihek a, mipui tan phurrit a thlen a, chumi chhawk zangkhaina tur hmanrua atan Mizoram Chief Minister-in PAHOSS hi a duang chhuak a ni.

State hausa leh thiltithei deuh chu ni ila PAHOSS ang chi ngaihtuahna hi thil ṭha leh ṭangkai tak a ni ngei ang. Chutihlaiin state rethei leh thawh chhuah nei ve lem lo tana a vaibelchhe tela mimal hnena 'a thlawna' sum pek chhuah hi chu ennawn a ṭha mai thei?

PAHOSS duang chhuak­­tute ngaihtuahna chu a ṭha viau a nih pawhin, a dawngtu ṭhenkhatte in hmun awmna te ngaihtuah hi chuan, tute'n emaw hmelhriat zawngte duhsakna atan an hmang ta mai anga puh a awl hle a, tute emaw in sak ṭanpuina lian tham angah a chang palh ang tih a hlauhawm ta hle.

A petu lam pawh­in 'a thlawn' tih an sawi miau avang hian a thlawn liau liaua mahni ina parking tur sak paha mahni in sak chhunzawm hi duh lo an awm lo hial mai thei.

State hausa ber berte pawhin a thlawna thil sem chhuah an uar loh tehlul nen, Mizoramah hian a a nuai sawm tel tehmeuhin a thlawnin sorkar sum hi mimal kutah kan pe chhuak mek zel a ni a, sorkar erawh sum indaih lohna avangin a buai viau mai bawk si a.