Vawk pûl hri, sorkar leh SEDP

Tun hnaia vawk hri léng avangin Mizoram hmun hrang hrangah vawk 600 chuang an a thi tawh; AH&Vety Minister chuan, "Kan hriat loh leh vèn phak lohah, hmun dang aṭanga vawk leh a sa la lut an awm avanga hetiang dinhmun kan thleng ta hi pawi kan ti tak zet a ni," a ti a; vawk hri lénga a mawhphurtu sor­­karin a chhui mek thu a sawi.

Mizoram sorkarin saa intodelh tumin theihtawp a chhuah mek a, chutihlaia vawk pûl hri a leng hi a pawi takzet a ni. Vawk vulha eizawng mi ṭhahnem tak an awm tawh a, khawpui leh a chheh­velah milianin a hlawm lian tak takin vawk an vulh chho mek a, thingtlangah pawh mirethei te tein intunnunna atan vawk an vulh ve mek bawk a ni.

Vawk pûl hri len chhan hi hriat a la ni lo a, eng hri chiah nge a nih pawh finfiah la ni lo mah se, AH&Vety Minister chuan pawn lam aṭanga dan phal loha vawk lakluh a nih vanga hri hi lo lut a nih a rin thu a sawi tawh a, sorkarin hri lenga mawhphurtu a chhui mek thu a sawi lang bawk.

Mizoram sorkar hian heng vawk pûl hri avanga vawk chânte hi zangnadawmna pek lam a la sawi ri lo a, vawk pûl hri lo luhnaa mawhphurtu zawn chhuah lam an sawi tawh thung. Tuna thil tih tur ṭul hmasa ber nia lang chu vawk chân tate tana chhawmdawlna pek chhuah hi a ni. Vawk vulhtu lamin mumal taka insu­rance an lo ti lo a nih pawhin tun hi a mipuite tana sorkar chet chhuah hun tak a ni.

Mizoram sorkar hian tun sorkar kumah ringawt pawh SEDP-ah cheng vaibelchhe 400 a dah a, heng sumte hi a hman hun tak a ni. Mizoram sorkar hian mipuite tawrhna hi a ngai pawimawh tak tak a nih chuan vawk pûl hri avanga vawk chânte hi SEDP aṭang hian zangnadawmna pe rawh se.