Shifting cultivation thlakna tur

Agriculture minister chuan, lo vâta hun rei lote chhung atan chauha neih ṭhin (shifting cultivation) chuan environment a tih­chhiat avangin zâwi zâwia tihtawp a ṭul thu a sawi a, "Shifting cultivation hian environment a tichhe nasa a, mahse, kan culture a nih avangin kan kalpui lo thei lo. Zâwi zâwia tihtawp dan zawn a ṭul a ni," a ti a; environment tichhe lo zawnga lo neih dan zawng turin Agriculture department-a mithiamte a chah.

Mizoramah hian kan pi leh pute hunlaia kan lo neih dan pang­ngai (shifting culti­vation) kha tun thlengin kan la ring a, kan la kalsan thei lo mai a ni lo a, loneitu tam zawkte eizawnna a la ni. Mizoram sorkarin shifting cultivation thlak theih dan hi a dap tawh ṭhin a, NLUP-ah sum tam tak dahin enchhin a lo ni tawh a, chumi hmain MIP te pwh kalpui a ni. Tunah mau chin hmang leh SEDP hmanga eizawnna dang min dappui an tum leh mek.

Thil lang chiang tak erawh chu eizawnna thlak tur chuan thil hi tih tak tak a ngai. Kan lo neih dan thlaka lo neih dan nghet, sum lalut hnem zawk leh environment tichhe lo zawk kan duh a nih chuan sorkar pawhin chumi lamah chuan sum a dah a ngai a, tuna kan sorkar budget-ah hi chuan shifting cultivation thlak thei turin sum dah a ni lo tih a sawi theih hial ang.

Hetihlai hian Agriculture minister ṭhahnem­ngaihna hi a fakawm a, hnathawhna tur sum mamawh ang an pe lo chungin theih­tawp a chhuah tho niin a lang a; shifting cultivation zawi zawia kalsan a duh thu a sawi te hi ngaihtuah zui tham, nakin zela kan ram tana pawimawh tur a ni.

Khawvelah tlang ram tam tak a awm a, tuna kan lo neih dan anga lo vat leh lo hal kher lo hian ram tam tak an intodelh thei. Kan ramah engkim mai a ṭhat duh thu kan sawi fo chungin Agriculture department lam mithiamte'n lo neih dan hlawk zawk mipui nawlpui tan min la chhawp chhuahsak thei chuang lo. Shifting cultivation thlakna hi kan duh tak tak chuan tun aia ngun zawka zir chian a, hemiah hian sum ṭhahnem zawk daha hma­chhawpa dah chi a nih hmel.