Aizawl tui harsatna

PHE department chuan thu­chhuah siamin, Aizawl khawpuiah mihring an pun zel avangin tui mamawhna a sang chho hle tih tarlangin, "Hei vang hian duhthusamin tui kan in pe thei meuh tawh lo. Thu leh awm hma chu tui connection pek tawh rih loh tur a ni," an ti.

Aizawl khawpuia tui pekna siam a nihlaia mipui awm zat leh tuna mipui zat hi a inthlau ta lutuk a, tui lakna lam a la ngai reng bawk si a, chuvangin Aizawl khawpuiah tui a vang a, PHE pawhin tui connection thar pek tawh loh tur thu a chhuah ta hial a ni.

Tunlai hian Aizawl khawpuiah tui a harsa takzet a, tui lei tur a vang a, tun hmaa tui phur ngai lem lo lirthei tam tak hmanga tui chawi a ni chung pawhin an inpe seng meuh lo. Chhungkaw tam tak chu khawpui pawna luiah insu turin an chhuak a, khawpui hnaia luite chu tun hnaiah a lun thei hle a ni.

Khúa a ṭhal rei ta a, lui tui a kâm a, tuikhur tam tak a kang chat bawk a; Aizawl khawpui chawmtu tui pump-na khawl chu electric transformer a chhiat avangin hun eng emaw chen hman theih a ni lo, hei hian tui harsatna a belhchhah zual.

Tunah chuan tui harsat chhan lam chu mipuiin an hre chiang ta a, he hun harsaah hian engtin nge sorkarin mipui harsatna sut kian a tum ang, tih lam hi a pawimawh ta a ni.

PHE department tán tun hma anga lirtheia tui chawia sem leh chu thil harsa a ni tawh mai thei a, chutih rualin khawpui enkawltu Aizawl Municipal Corporation leh Local Council ṭang rualin a mamawh zualten tui an hmuh theih dan hi chu dappui thei se a ṭha ngawt mai.

Tui nei lo hi a dah khawlna nei lo mirethei zawk leh mi in luahte an ni fur a, heng mite an harsat zual laia chhawk zangkhai dan zawng thiam sorkar, AMC leh local council hi awm thei se khawpuia miretheite an läwm khawp ang.