Vantlangah hri a darh tawh em?

Health Minister chuan, Mizoramah Covid-19 vei February thlaah mi 51 chauh hmuh chhuah a nih laiin, April thlaah chuan thla chanveah mi 246 hmuh chhuah a nih tawh thu sawiin, "Kan dinhmun a ṭha lo. A lan danah chuan, community spread a thleng ta emaw tih tur a ni. Zin veivâk hawin an kái nasa a, an chhungte pawhin an kái nasa tawh," a ti.

India ramah Covid-19 a darh leh nasa ta a, ni khat­ah mi 2,00,000 chuang­in an kai tawh a, khawvela Covid-19 darh chak berna ram a ni chho ta mek. Hetihlai hian Mizoram state bik hi chu Covid-19 positive tlemna state a la ni reng a; nimahsela tun hnaiah zin veivak zingah Covid-19 positive hmuh chhuah an pun zel avang­in fimkhur a ngai ta hle.

Tun hnaia hripui kai tharte chanchin an tihchhuahah 'kaina hriat loh' a awm nual a, symptom neih avanga mahnia in-test-tir zingah positive hmuh chhuah an pung zel. Kaina chin hriat lohte hian symptom a lan chhuah hmain midang an lo kai darh nual tawh mai thei a, kan zavaiin in-test ta chiah ila kan dinhmun hi a ṭha lo viau mai thei a ni.

Mizoramah Covid-19 vanga thih­na a thlen tlem avang leh hri kai zingah natna lang chhuak lo (symptom nei lo) an tam avang khan kan hlau loin kan fimkhur tawk ta lo deuh niin a lang a; nimahsela tun hnaiah natna lang chhuak an pung a, thihna hial a thlen bawk avang hian kan fimkhur thar a ṭul takzet a ni.

Mizoramah hian Covid-19 hripui hi vantlang zingah a lo darh reng tawh palh thei a, hei vang hian thuneitute inkaihhruaina siam zawm ila, fimkhur leh thuawih takin i awm ang u.