Sorkarin sumdawngte a en hrang em?

Mizoram Merchant Asso­ciation (MIMA) chuan thu­chhuah siamin, Mizoram sorkarin hmai tuamna (mask) vuah lote Rs 100 chawi tura a tih laia dawr nghaktu mask vuah lote Rs. 1,000 chawi tura a tih chu hrethiam loin midang chawi aia säng pawisa pe bik lo turin sumdawngte an hriattir a; sorkar chu sumdawngte en hrang bikah an puh.

Sumdawngte harsatna tawh leh an lungawilohna an lan chhuahtir dan hi thlir liam mai loa ngun taka ngaihtuah zui ngai a ni a, sorkarin sum­dawngte a zuam lutuk bîk a nih phei chuan a fel lo hle ang.

Covid-19 tuar nasa ber zinga mi chu sumdawng, a bikin dawr siama sumdawngte hi an nih hmel a, thlà tam tak dawr an hawn theih loh piah lamah hawn phalsak an nih hnu pawhin dawr hawn hunbi tuksak an ni a; tunah dawr nghaktute chu mask vuah loh vanga hremna siamah mi pangngaite hremna aia a let tam taka naa hrem tura tih an ni leh ta a, sumdawng pawl an lungawi lo hi a âwm hle a ni.

Hetihlai hian sorkar lam pawh hi dem chiam tur an ni bîk lo, sumdawngte an en hran bîk vang lam ni loin mipui vantlang tana him ber tura an ngaih vangin he ruahmanna hi an siam a ni ngei ang. Chutihlaiin sorkar lam pawhin an thu rel tawh an sût fo tawh angin he thu bîk hi ngaihtuah nawn hreh lo se, Covid-19 kaihhnawihah thil rel fuh kim a harsat em avangin sum­dawngte thlirna zawn aṭangin thlir nawn thei se a ṭha khawp mai.

Covid-19 chung changa inkaih­hruaina siamtu ber sorkar hnathawkte hi chu hripui len vanglai pawha hlawh kiam chuang lo, an sum lakluh ngai reng a ni. Sumdawngte erawh sum lâk luh lama hripui tuartu an nih hi hriatthiampui an ngai a, midangte aia dawr nghaktute hremna na zawk pek hi chu ennawn a sual awm lo e.