I ṭang rual ang u

India ram pumah Covid-19 hripui lengin zual lam a pan zel a, Mizoramah pawh hripui vei an pung zel a ni. Tun April thlaah ringawt pawh Pathianni thleng khan hripui vei mi 433 hmuh chhuah an ni tawh. Tuna a lan danah hi chuan, hripui hi mipui vantlangah a darh tawh tak tak a nih hmel.

Hripui a hluar zel a, hri kái an pun zel avangin Mizoram sorkar hotute leh damdawi lam thiamte an mangang ru hle tawh niin a lang a; kan tualzal nunah eng ang nge kan dinhmun zel tur hriat ni lo mah se, kan sorkar hotute'n uluk tak leh fimkhur takin kan awm dan tur an rêl ngeiin a rinawm.

Sorkar hotute rorel chu eng ang pawh ni se, a nghawng theih thil chi hrang hrang ngaihtuah chungin kan ram leh mipui ṭhat tlânna ber turin an rêl ang tih ring tlat ila. Inkhârkhipte pawh an rêl a ni thei a, chumi avang chuan harsatna eng emaw mipui lamah kan tâwk thei bawk tih hria ila, rilru inkau takin mipui i awm phawt ang u.

Covid-19 hripui lêng mek hi hri satliah a ni lo, khaw­vel sorkar hrang hrangte leh mipui nunphung tibuai­tu a ni. Hripui laka keimahni, kan chhungkua, kan khawtlang leh kan ram leh mipui nâwlpui ṭhat tlânna zawk tur a ni tih hriain kan hotute rorel ang te kan pawm thiam a ṭul ang. Khua leh tui ṭha kan nih angin sorkar leh Covid-19 donaa a taka thawk chhuakte hi ṭha taka thlâwpin zel ila, i ṭangrual tlat ang u.