Mipui hriata puanzar hun

Mizoram sorkar chuan April 20-26, 2021 inkara 'Mizoram chhunga Covid-19 dona kalpui dan tur inkhuahkhirhna thupek a chhuah a, he thupek thar hi April 19 zanlaiah mipui hmuh theih turin social media kaltlangin tihdarh a ni.

Covid-19 chung changa thil khirh tak pakhat chu rorel a fuh hleithei lo leh rorel tawh thlak fo a ngai hi a ni. A hmaa kan himna atana ṭha tawka ngaih kha a ṭhat tawk lohna a lo awm thar a, thurel tawh sût a ngai fo ṭhin. He thilah hian sorkar hi a demawm hran lo a, kan zavaia tana thil thar leh harsa tak a nih miau avangin sorkar pawh a inzir mêk zel a, mipui tana ṭha ber tura ngaiin huaisen takin a thurel sâ pawh a thlak leh ngam ṭhin a ni mah zawk ang.

Hetihlai hin thil ngaimawh­awm tak erawh chu mipui inkhuahkhirhna puan hun tlai lutuk ṭhin hi a ni a, hei pawh hi sorkar inthlahdah lam aiin kan hun tawnin a zir loh vang a ni mah zawk a. Chutihlaiin a tuk zinga hman mai tawh tur zanlaia puan a nih hian mi tam tak tán buaina a thlen ṭhin; a bikin mi rethei zawk eizawnna na takin a nghawng a ni.

State dangah pawh in­khuahkhirhna (lockdown leh partial lockdown) an puang ṭhin a, a inkarah inbuatsaihna hun nei deuhin thuchhuah an siam ṭhin. Kan ramah chuan zanlaiah te social media kal tlangin, mipuiin a tuk zinga kan awm dan tur kan hre thei chauh a, traditional media an tih chanchinbu, radio leh television lam tana puanzarna hun pawh awm lo khawp leh mipui tan pawha inbuatsaihna hun awm loah mipui nghawng thu chhuah a ni ṭhin hi chu pum­pelh theih ni tawh se a duhawm khawp mai.

Heng inkhuahkhirhna thurel hretu tur chu mipui an ni a, anni tán pawha hriat theihna hun remchang zawn hram hram a ṭha a ni. Zanlai pelha a tuka awm dan tur hriat chauh ṭhin hi chu pumpelh theih ni tawh se a ṭha hle ang.