Kum khat chhungin sorkar a inring em?

Covin-19 avangin khawvel a buai a, India ram a buai a, Mizoram pawh nasa takin kan buai. Lockdown avanga kan buaina pawh kum khat a pel tawh a, tunah hian lockdown hming vuah chiah loin inkhuahkhirhna hun kan hmang leh mek a ni. Mizoram pawh kawng hrang hrangin kan in­kharkhipin kan inkhuahkhirh leh ta mek a ni.

Covid-19 hri len tirha kan buaina chu a hri vei leh vei lo enna khawl RT-PCR kan nei ve lo kha a ni a, sorkar lamin khawl bun a hautakzia leh laboratory a duh changtlunzia an sawi nasa a; nimahsela mithiam hrang hrang an rawn hnuah khawl hawh chawpin ZMC-ah laboratory an din a, ṭha takin a kal thei. Hemi hnu hian mipui sum thawhkhawm aṭangin TrueNAT khawl lei a ni leh a, enna dang Rapid Antigen Test-te hman a ni zui leh ta bawk.

Kum khat a liam tawh a, kan sorkar hian ZMC-ah laboratory changtlung a din thei ta em? Lunglei lama hman tura Congress MLA-in a lei RTPCR khawl te kha hman theih a ni ta em, tih leh Lungleia laboratory siam tura sorkarin a sawi kha he kum khat chhung hian an siam peih hman em? RTPCR khawl USA aṭanga chahte kha a lo thleng tawhin hman theihin dah a ni tawh em?

Covid-19 hri leng avanga khawvel ram ropuite pawh an buaina chu ICU-a khum indaih lo leh ventilator indaihlohna nasa lutuk hi a ni a, kan sorkar hian he kum khat chhung hian ICU-ah khum engzat nge a dah belh a, ventilator hman turte a neih belh em? Mizoram sorkar hi kum khat kal ta leh tun inkarah hian Covid-19 hripui hmachhawn tur hian eng ang takin nge a inbuatsaih a, eng hmasawnna nge a neih tih hi hriat chakawm tak a ni.