Vawk thi leh sorkar

Mizoram hmun hrang hrangah vawk pûl hri African Swine Fever (ASF) avangin vawk 1,000 chuang an thi tawh. Heng vawk thite tana zangnadawmna pek tur thu emaw, vawk chân tate chhawmdawlna lam hawi thu emaw sorkar aṭangin puan a la awm lo.

Mizoramah vawk pûl hri hlauhawm ber chi a leng thut mai a, vawk vulha eizawng chhung­kaw tam tak ṭapin an rum mek a ni. Mizote hi vawksa ei nasa tak hnam ni mah ila vawksaah kan la intodelh lo a, vawk vulh uar turin sorkar pawhin mipuite a fuih nasa a, tunah vawk pûl hri a leng ta a, mipui an buai ta a ni.

He vawk pûl hri hi khawi aṭanga lo lut nge tih finfiah la ni lo mah se dan loa vawk lakluh aṭanga lo lut tel a nih a rinawm hle. Eng pawh nise hei hi chu thuneitu lamin an finfiah hnuah dan anga hrem tur an awm a nih chuan dim lo se a ṭha ang. Tute emaw dan bawhchhiat vanga ASF hi lo lut a nih ngat chuan, chhungkaw tam tak ṭahna thlentu an ni mek.

Hemi lehlamah chiah hian sorkar hi a mipuite tan a chet chhuah a ngai a, vanduaina vanga an eizawnna buai ta, vawk vulha innghat chhungkaw tam takte puihna hi a ngaih­tuah a ṭul khawp mai. Sorkar chu sorkar nge nge a ni a, a duha ṭul a tih phawt chuan pawisa chu a nei thei zel a, sorkarin vawk vulhtute tawrhna hi a ngai pawimawh tak tak a nih chuan zangnadawmna hi a pek ngei a ngai a ni.

A thua in ngaihsak ringawt a hun tawh lo a, inthlan hmaa cheng nuai thum zet pek min tiamtute kha an sorkar ta a, ASF avanga vawk chânte puihna hi a takin pe ngei se, kan sorkar hian a mite harsatna tawh hi en liam loin a pui ngei ang tih i ring ang u.