Kuhva rah hi tawlh 'ruk' a ni em?

Champhai leh Khawzawl district kaltlanga Myanmar aṭanga kuhva rah tawlh ru an tam a, kuhva rah, a phurtu lirthei leh mihring eng emaw zat man a ni tawh. State sorkar hnuaia thawkte'n kuhva rah an man tawhte chu Customs hnenah an hlan ṭhin a; dan loa kuhva tawlhtute hian khaw ṭhenkhata khawtlang hruaitute pawisa pein an tham ṭhin nia an hriat thu Champhai DC chuan a sawi.

Khawzawl DC hoa district SP, 2nd IR Commandant leh sorkar mi pawimawh dangte, Khawzawl Sub-Hqrs. YMA hruaitute leh kuhva rah phur lirtheiin a paltlang VC-te ṭhukhawm chuan, an district kaltlanga kuhva rah phurh ṭhin tihtàwp a nih theih nan thawhho an rêl a, kuhva rah phur an mante chu Champhaia Customs ho hnenah an hlan ṭhin.

Myanmar aṭanga Mizoram kal tlanga kuhva rah tawlh ruk hi Mizoram sorkar tan mualphona lian tak a tling ta a, dan loa thil phurh ruk ni si langsar taka an kalpui reng leh motor liana an phur lûk lûk hmuh tur a awm reng te, a khat tawka Assam Rifles lamin an lo man ve reng maite hian kuhva rah phurh danah hian thil fel lo tam tak a awm tih a tichiang hle.

Kuhva rah phur lirtheite hian Zokhawthar-Champhai-Aizawl inkar kawngpui an rap chhe nasa ṭhin hle a, khaw chhak lam tlang dunga mite'n hun rei tak chu an lo tuar tawh a ni. Hetihlai hian kuhva rah phurh hi a hlawk tih phat rual a ni lo a, khaw chhak ramria awm khaw hrang hrangah motor lian leh kuhva phurhna chi lirthei nei an pung chak a, phurh tur pawh an hmu reng a ni.

Sorkar chakna hmanga kuhva rah phurh tihtawp tumna hi awm ve bawk mah se sorkar hian tihtawp tumin thapui thawhin a bei duh lo emaw, a bei ngam lo emaw, a bei phal lo emaw a ang hle.

Kan kawngpui pawimawh pal tlangin ram pawn aṭangin dan loin thil an phur lut reng a, a ruka phur pawh ni loin langsar takin an kalpui ta a ang a, mipui nawlpui chuan eng vang taka kuhva rah phurh ruk hi tihtawp theih loh nge a nih, tih hi an inzawt chhunzawm zel dawn a nih hmel.