State pawn aṭanga lo lutte Khung hran vek a theih em?

Mizoramah Covid-19 positive a ni telin an pung zel a, he hripui aṭanga mipuite an him theihna tur leh hripui leng tihziaawmna turin sorkarin inkhuahkhirhna a kalpui mek pawh pawh sei a ni a; tunah hian Covid-19 positive mi 700 chuang kan nei a ni.

Nikum khan Mizorama Covid-19 a len tak tak hmain Mizoram sorkarin nasa takin ṭan a la a, mipui tlawm­ngaiin Village/ Local Level Task Force dinin ṭan an la bawk a, sorkarin state pawn aṭanga lo lut thar apiang a khung hrang vek bawk nen, India rama hripui laka state him ber pawl kha hun rei tak kan ni thei.

State pawn aṭanga a sing bia an lo luh pawhin sorkarin a tum tak tak chuan a lut thar apiang a khung hrang thei a, tunah khawvel huap pawha hripui pun chakna ber ram kan nih hnua lo lut tharte hi khung hran leh vek theih ni se hri leng hi kan in kai darh nasa lo deuh ngei ang. Lo lut tharte hi an luhna hmunah RAT-a endik niin a negative-te chu mahni ina inkhung hran phalsak ni bawk mah se, hei hi a him tawk lo a ni tih chu a takin kan tawng mek a ni.

Sorkar hian state pawn aṭanga lo lutte hi khung hrang turin sum leh pai a nei lo a nih pawhin tlawmah la loin mipuiah Chief Minister Relief Fund mamawh a nih thu puang leh mai se, kan state a him theihna tur a nih phawt chuan mipui pawhin pawisa thawh an hreh lo tih kan hmu tawh.

Mipuia thawhlawm khawn a hreh a nih pawhin state pawn aṭanga lo lut tharte hi sorkarin hmun bik a ruatah khung hran ngei ngei tur (mandatory quarantine) tih thu chhuahin ei leh in man pawh mahni intum tur tih sawi chiang nghal bawk se, khung hran hun an hman zawh hnu­ah RTPCR hmanga endik ve tura rua­hman ni se, test man pawh mahni intum tur tiin sawi chian nghal ni se, kan hripui lakah hian tun aiin kan him thei deuhin a rinawm.

Hripui a hlauh­awm zual hmain fimkhur takin kan lo kal thei tawh a, kan hming pawh a ṭha hle nghe nghe a; nimahsela India rama hripui a dath hnuah hian kan inthlahdah ta telh telh niin a lang a, mipui nawlpui lakah sorkar hi a khauh tluan thei lo a nih pawhin, state pawn aṭanga lo lutte lakah tal hian fimkhur leh khauh zawkin hma la thei/ ngam se a ṭha ngawt mai.