Chhiatna thlengin min beng harh se

Tun hnaiah Mizoram hmun hrang hrangah kang­mei a chhuak nasa a, hmun ṭhenkhatah kangmei chhuak hi mihring fimkhur loh vanga thleng ni mah se, hmun ṭhenkhata mi hi chu khaw ṭhal rei tawh leh ro lutuk vanga kangmei chhuak niin lang. Chhiatna thleng avangin mi tam takin an huan thlai an chân tawh a, khaw chhung a kan kai avanga in chân pawh an awm nual a ni.

Mizoramah khúa a ṭhal rei a, tui hna tam tak a kang chat bawk nen, ram pumin tui kan nghei a ni deuh mai a, khawl hmanga tui pump-na hmang thei khawpuite pawhin tui pump tur duh khawp an nei ta meuh lo. Kan ram kan duat thiam lo a, kan thing leh maute kan hal ral nasa a, bawlhhlawh leh leivung kan paih duhdah kan tuar mêk bawk a, heti zela kan kal chuan kan hmalam hun hi a huphurhawm takzet a ni.

Heng harsatna kan tawhte hi van­duai vanga thleng ni loin keimahni tuh rah kan seng vang a ni ber a, kan inzir fing lo a nih chuan hei aia chhe zawk hi kan hmabakah hian a awm palh thei tih hriat a ṭha ang.

Tun hnaia kan tui hnar kang chat nasa te, tui vanga harsatna kan tawhte hian min beng harh se, kan chenna leilung leh min hual veltute kan duat a ṭulzia min hriat chhuahtir se a ṭha ang.