Fire & Emergency Services

Mizoram hmun hrang hrang­ah kangmei a chhuak nasa hle, Lunglei khawpui chhehvela ram kang avangin mipuite an buai hle a ni. Hetihlai hian Lungleia Fire & Emergency Services chuan kangṭhelh motor pahnih chiah an nei a, hnathawktu awm zinga pariat chiah hi kang ṭhelh tura inzir an ni.

Mizoram sor­kar hian kawng ṭhen­khatah hma a sawn viaulai hian thil pawimawh ṭhenkhat hi a mangnhgilh rei hle tih a lang a, chumi lan chhuahna chu tun hnaia kangmei chhuakah hian a ni. Mizorama khawpui lian ber dawttu Lungleiah kangṭhelh motor pahnih chiah a lo awm maite hi thil mak tak a ni a, chutihlaiin district capital ṭhenlhatah hei ai hian kang ṭhlehtu lam hi an la pechhe zawk nia sawi a ni.

Home department hnuaiah hian a lu nungin mihring an ṭhahnem hle ang a, Fire & Emergency Services lam hi an indaih lo deuh niin a lang. Hetihlai hian kangmei a chhuah loh chuan anni lam hi an awl ve viau thei bawk a, an indaih zat tur hriatthiam erawh a har hle ang. Heti chung hian an indaih lohna langsar tak chu kangṭhelh motor leh kang ṭhelhna hmanrua lamah hian a ni a, hei hi sorkar hian hriatpuiin ngai pawimawh thei se a duhawm hle.

Kan ram awm dan en hian kum tin maiin ṭhâl a na tial tial emaw tih mai tur a ni a, tlangram lo neih avanga loh theih loh a ram kan hal piah lamah kut hlei leh fimkhur loh vangin kan ram ngaw kan tikang nasa hle a, hei vang hian kang ṭhelhtu lam inthuam ṭhat hi chu kan ma­mawh takzet a ni.

Kan sorkar pawhin kang ṭhelhtute indaihlohna a takin a hre tawh a, sorkar chuan sum indaih loh deuhlai pawhin a ngaih pawimawhah chuan sum hi chu a belh theih zel a, Fire & Emergency Services lam hi thuam ṭhat an ngai hle tih chu kan hun tawn makah hian a lang chiang ta hle.