Politics mah ni se infak uchuak a awm thei

Mizorama ruling party MNF chuan thuchhuah siamin Lungleia ram kang ṭhelhna atana Indian Air Force (IAF)-in helicopter an rawn tir chu chief minister Pu Zoramthanga hmalakna vang liau liau a nih thu an tarlang a, "He thil thleng chungchangah hian sawi nawi phêt tumna leh a titu-a mi dang tute emaw tih anga thu lo thehdarha thangṭhat lak tumte an awma hriat a ni. Hei hi kan CM chak tak leh thil ti thei tak Pu Zoramthanga hmalakna vang liau liaua thihlawhtlin a ni," an ti.

Lunglei khawpui kiangah kang mei a chhuak a, mipui an mangang a, theihtawp chhuaha an beih hnuah pawh an ṭhelh mit hleithei lo. Mizoram sorkar kangṭhelh motor-te a tlem tham si a, Lungleia awm sa bakah Aizawl aṭangin an ko phei a, hei bakah hian IAF lamte hial pawh auh an ṭul ta hial a ni.

Hetiang hunah hian IAF hi au thei an awm a nih ngei chuan chief minister hi a ni ngei ang a, state hotupa ber a nih vangin a tih tur dik tak pawh a ni. Ram a kan chuan pa ber chuan a ṭhelh dan a zawng tur a ni a, chutih laia IAF helicopter lo lut chu chief minister hmalakna a nih thu lo puan chiam leh, chief minister a hming ṭha lo ang tih hlaua ama awmna political party ngeiin thuchhuah an siam hi chu tih loh atana mawi a nih zawk hmel - ṭhalai tam tak mahni nunna thapa kang ṭhelh tura pen chhuakte kha an zahawm hle a ni.

Hetiang hunah hian eptu pawl lam tan hmalak theih a ni lo a, tlawmngai pawlte leh mipui tih theih chin a tawp tawh a, IAF hi pun an ngai a nih chuan sorkarna vawn fung chelhtute tih tur a ni. Kumin March thla mai pawh khan Manipur-a Ukhrul district-a ram kang ṭhelh turin Manipur sorkar chuan IAF helicopter pahnih an lo dil chhuak tawh a; Manipur leh Nagaland inrina bula Dzukou Valley-a ram kang ṭhelh turin IAF ta, Mi-17 helicopter pali chu kumin January khan tirh a lo ni tawh. Hetiang en mai pawh hian IAF ko thei nih hi thiltithei leh mi chak tehna pawh a tling kher awm lo e.

Tute'n emaw kan chief minister hmalakna ni loa an lo sawi a nih pawhin ruling party meuh chuan puitling takin ngawih chuh thiam se, ṭhenawm state-te pawhin an lo koh tawh IAF helicopter chah luh chungchanga, 'kan CM chak tak leh thiltithei tak hmalakna vang liau liau,' han tihte hi thil inhmeh tak a ni lo.

Politics-ah hian uchuak taka insawi chhiat chiam leh uchuak taka infakte hi a leng vek angin kan ngai a ang a, thil ṭhenkhatah hi chuan ngawih chuh hi a finthlak zawk chang a awm ṭhin si a.