Sorkar ruahmanna a fakawm
Mizoram sorkar chuan Delhi-a Vasant Vihar hmuna Mizoram House-a hall chu Covid-19 positive-te enkawl theihna turin a cheibawl dâwn a, a ṭul chuan ICU anga hman theih tura ruahman a ni. Chief minister Zoramthanga tarlan danin Covid-19 vei enkawlna leh chawlh hahdamna turin an siam dâwn a, a rang thei anga hma la turin a hriattir tawh a ni.
Chief Minister ruahmanna siam hi thil lawmawm tak a ni a, Delhi-a awm Mizote tán a thlamuanthlak hle ang. India ramah Covid-19 vei an pun belh zel a, Delhi-ah he hri hi a hluarin Mizo zingah pawh harsatna tawk an awm nual tawh a, nunna chân hialte pawh an awm. Delhi-ah hian damlo na zual lo tan chuan damdawi-in chan pawh a harsa tawh a, hetihlaia Mizo damlote tana ruahmanna siam hi a finthlak hle a ni.
Chief Minister-in a sawm ang hian Delhi-a Mizo doctor leh nurse awmte pawh an thiamna leh finnate Mizo damlote tán hmang thei se, hun harsa bik leh manganthlak tawn laia mahni hnampui harsatna tawkte pui turin inpe chhunzawm zel thei se. Delhi Mizo Welfare lam pawhin hah taka an hnathawhte mek chhunzawmin theihtawp lo chhuah zui zel thei se a lawmawm hle ang.
Mizoram sorkarin Delhi leh a chhehvela Covid-19 vei Mizote tana ruahmanna a siam hi a lawmawm takzet a ni.