Sorkar official-te leh Sorkar hruaitute

Assam-in Mizoram an rawn chuhpui avanga tun hnaia buaina chhuak chungchangah sorkar laipui ruahman angin October 31 khan Mamit DC leh Karimganj DC an inbia a, hetihlai hian Kolasib DC leh Cachar DC-te inbe tura tih erawh chu Vairengte mipuiin Cachar lamin kawngpui an dan chhung chu indawr lo tura an tih avangin Kolasib DC hi an lo dang a ni. 

Ramri buainaah hian sorkar laipuia Ministry of Home Affairs (MHA) lam ruahman thoin October 21 khan Silchar-ah Mizoram Home secretary leh Assam Home secre­tary-te an inbe tawh a, an inbiak zawh hian boruak ṭha tak awm tura beisei a nihlaiin Assam lamin kawngpui an la dang chhunzawm zel a. Mizoram sorkarin kan ram chhunga police-te duty post Assam-in sawn hla tura an tih chu an sawn hlat duh bik loh avangin Assam hian kawngpui hi an la dang chhunzawm zel niin a lang. 

Silchar-a inbiak tûkah hian Mizoram sorkar chuan Twitter hmanga thuchhuah siamin, chief minister-in Home minister, chief secretary leh Home department official-te a biak hnuah sorkar laipuiin thutlukna mumal a siam hma chu Mizoram Police-te an dinna ngaia an din tur thu a rawn sawi ve leh ta a. A hmaa Silchar-a Mizoram sorkar aiawha telte thu hawn leh a tuka sorkar hruaitu lu ber thu chu a inang lo ta hret niin a lang. 

Mamit DC leh Karimganj DC inbiak chungchangah hian mi tam tak chuan Mamit DC hi mimal taka an dem thu an au chhuahpui nasa a. Hetihlaia hriat tel atana ṭha chu Mamit DC hi ama thua Karimganj DC dawr tura Assam-a kal a ni ngawt thei lo a, sorkar hruaitute thu hmu lo chuan a kal lo ang tih hi thil chiang sa a ni. An inbiakna thu leh an indawr danah pawh a mimal ngaihdan a sawi thiang lo a, sorkar aiawha kal a nih angin sorkar thu bawk a thlen ngei ang. 

Kolasib DC pawh Mizoram sorkar thu ang bawkin Assam-ah Cachar DC dawr turin a kal chhuak a; nimahsela Vairengte khaw mipuiin kal tlang rem ti loin an lo dang a, Cachar DC nen hian an indawr ta lo mai a ni. Kolasib DC hi chuan thupetu thu angin Cachar DC dawr turin Assam a pan a, a mimal thutlukna ni loin sorkar hruaitute thu hmua kal a ni ngei ang. 

Tun hnaiah sorkar hna­thawkte (sorkar official) ram tana ṭhahnemngai lo leh ramri chungchanga ṭang ngam lo ang maia puhna hmuh tur a awm zauh zauh a. Sorkar official-te chet dan kan dem laiin ram hruaitute zawk 'hero' taka lantir tuma puh theih tur thil a awm leh ṭhin. Sorkar offiicial-te anmahni thuin an che chhuak ngawt lo a, an mimal thu an sawi lo a, a tirtu ram hruaitute tirhna hmunah an kal a, ram hruaitute thurawn angin meeting-ah hian thu ken an nei ṭhin tih hi mipuiin kan hriatthiampui a ṭul khawp mai.