Vawk thi sawngbawl chungchang

Vawk pûl hri African Swine Fever (ASF) vangin Mizoramah vawk 1,500 chuang an thi tawh a; Aizawl khawpui leh a chhehvela vawk thite phumna tur hmun chu Aizawl Municipal Corporation ramah siam a ni. AMC hian vawk thi tuamna tur a thlawnin sorkarah an pe a; hetihlai hian vawk thi phumna tur bul hnaia awm veng ṭhenkhat chuan an awmna hnaia vawk phum an duh lo.

ASF awm dan en hian vawk thi sawngbawl hna hi hna hautak tak a ni tih a chiang a, vawk vulhtu dangte tana harsatna thlen thei a nih vangin a phumna tur hmun thlan danah pawh fimkhur a ngai hle reng a ni. Veng ṭhenkhatin an awmna bul hnaia vawk thi phum an phal lo hi dem tur an ni lo; tute emaw vanduaina avanga vanduaina dangin midangte a belhchhah chuan thil pawi zawk a thleng palh thei tlat a ni.

Hei vang hian thuneitu lam pawhin vawk thi phumna tur hi hmun fâl ṭha, a bul hnaia mihring cheng an awm lohna leh vawk vulh dang an awm hnaih lohna hmun an thlan thiam a pawimawh a, chutiang hmun remchang chu a vang deuh a nih pawhin sorkar tan chuan zawn hmuh theih loh thu a awm lo ang.

AMC lamin phal taka an rama ASF avanga vawk thite phum an phalsak hi an tilawmawm a, vawk thi tuamna tur thlenga an ruahman hi an fakawm hle. Hetihlai hian khawtlang mipuiin anmahni leh an vawk vulhte tana him lo nia an hriat leh an hlauhthawn theihna hmuna vawk thi phum loh dan zawn ni thei se a lawmawm hle ang.