Kar khat hi hman ṭangkai i tum ang

Mizoram sorkar chuan Covid-19 hri leng zel tihzia­awmna a nih beiseiin May 3 zing dar 4:00 aṭanga May 11 zing dar 4:00 thleng Mizoram-ah 'lockdown' a puang a, in­kaihhruaina pawh a tichhuak tawh a ni.

Mizoram sorkar hian kar hnih chhung chu 'inkhuahkhirhna' tiin Covid-19 laka kan him zawkna turin ruahmanna a lo siam tawh a; nimahsela he mi chhung hian nitin deuhthaw mi Covid-19 hri kai thar mi 100 chuang hmuh chhuah an ni deuh zel. Chutihlaiin inkhuahkhirhna hian rah ṭha a chhuah nge chhuah lo tih chu kan la hre chho ṭan dawn chauh ang a, kan zavaia kan chhuah theih hunlai ai chuan hri hi a darh chak loh phah ngei ang tih chu a rin theih.

Tuna kar khat chhung atana lockdown puan a ni leh ta hi mi ṭhenkhat eizawnnain tuar deuh dawn mah se kan zavaia ṭhatna tur a nih beiseiin sorkar hian a puang a, ti lo thei lo dinhmunah a awm tawh a ni ber.

Kan damdawi-in dinhmun leh a chhunga ICU leh venti­lator kan neih zatte thlir hian, Ciovid-19 hripui thawk thar leh mek hi hmachhawn a huphurhawm takzet a ni.

Sorkar hian lock­down a puang ta rau rau a nih chuan 'inkhuahkhirhna' a tih hunlai aia khauh deuh zawk leh awmze nei zawka kalpui theih ni hram se, LLTF-te lehkha hmanga pawn chhuak thei tam lutuk pawh en zui deuh tawh ni se.

Inkhuahkhirh hun laia Aizawl khawpuia lirthei veivak aṭanga thlirin 'lockdown' lamah chuan lirthei veivak pawh an tlem sawt turah ngai ila; mi tam tak eizawnna pawh chhunzawm thei loa kan inkhuahkhirh laiin tute emaw len chhuahna pawh dâl mang si loin kan lo kalpui hlauh palh ang e.