Serchhip bial MPF an entawntlak

Serchhip biala MLA by-election chu tluang taka neih zawh a ni ta a, vote a tla ṭhain kawng hrang hrangah Mizorama inthlan hriatrengtlak a ni ang. Vote thlak hma leh vote thlak hnuah pawh political party hrang hrangte'n Mizoram People Forum hmalakna zarah inthlanna thianghlim leh muanawm tak, ṭum dang anga poster, banner leh flag pawh an tar mang lohna inthlan a nih thu an sawi hlawm.

MPF hian inthlan­na thianghlim leh felfai tak neih a nih theihna turin Mi­zoram hmun hrang hrangah ṭan an la ṭhin a, an thawhrimna zarah inthlan senso pawh a tlakhniam phah nasa a ni. Tun hma anga ruaiṭheh, picnic, huau huau siam, flag, banner leh poster vela insenso kha a tlem phah a; sum leh therhlo ualau taka sem pawh politician lamin an insum phah deuh niin a lang.

Hun a kal zel a, MPF-te kan zahna leh kan hlauhna pawh zawi zawiin a tlahniam ta emaw tih tur a ni a, tun hnaia Aizawl Municipal Corporation inthlanah phei kha chuan party tinin flag, poster leh banner an uar em em vek a; candidate ṭhenkhatin ṭhalaite punkhawm­na hrang hrang an buatsaih leh ṭan a, tun hmaa kan kalsan tawhah khan kan kir leh lek lek a - political party tinte he thilah hian an bang bik lo ang.

Serchhip bial-ah by-election neih a ni dawn a, Serchhip bial MPF lamin ṭan an la nasa a, inthlanna kalpui duh dan fel taka ruahmanna awm sa, political party tinin pawma hming an ziah hnan ang taka kalpui an duh thu an sawi a, chutiang tak chuan an kalpui niin a lang.

Mizoramah hian inthlan kan la hmachhawn fo dawn a, heng hunah hian Serchhip biala MPF-te chet dan entawntlak tak hi khaw tin leh bial tinin entawn thei ila a duhawm hle. Serchhip bial by-election-ah hian inthlanna felfai leh thianghlim, hautak lo zawk Mizoramah ngei a buatsaih theih tih a takin kan hmun nawn leh a ni.