CYMA leh sorkar
Mizorama lui 16 kam tuaka ram metre 800 humhalhna dan, kum 1965 aṭanga hman tawh chu Gauhati High Court, Aizawl Bench chuan January 27, 2021 khan ṭhiahna thupek a pe chhuak. He thupek hi Mizoram sorkar chuan khin let a tum lo a, chutihlaiin Central YMA chuan he dan hi hman leh ngei a nih theihna turin hma an la mek.
Mizorama kan lui kam tuak metre 800 hi Riverine Reserved Forest (RRF) niin dan angin hemi chhungah hian ram neih theih a ni lo a; nimahsela Tuirial Hydel Project siamna tura compensation dilna kal zelah RRF chhungah hian ram nei mi eng emaw zat an lo awm a, kum 2016-a Chief Secretary-in order a chhuahah chuan heng RRF chhunga ram neite hian compensation hi an beisei ve thei lo ang, tih a ni. Ram neitu mi 681-te chuan kum 2016-a Chief Secretaty thuchhuah leh kum 1965 aṭanga lui humhalhna dan awm sa chu High Court-ah khingin an chak ta a, lui humhalhna dan hi ṭhiah a lo ni dawn ta a ni.
Hei hi Mizoram sorkar hian khing letin (appeal) thapui thawhin lui tui leh a chhevel ram humhalh tura ṭan a lak ngei a rinawm laiin, sorkar hian khin let a tum loh mai bakah ram neitute compensation pek dan tur hi a ngaihtuah niin Assembly House-ah Power & Electricity Minister chuan ziakin a tarlang a, mipui mak tih a hlawh hle a ni. Hei hi mipui mimirin thil awm dan chiang zawka an hriatin nasa takin an sawisel a, social media-ah lui leh a chhehvel ram humhalh duhna an aupui bakah kan sorkarin High Court thutlukna a khing let duh lo leh compensation pek dan a ngaihtuah zui mai demna a tam hle.
Mizoram sorkar hian April 14, 2021 khan notification tichhuakin lui 16 leh a kam tuak humhalhna hi a chhuah ngei a; nimahsela a hmaa dan ṭha zawk leh chak zawk awm sa an khinna pawh khing let duh si lo a, a hranpaa notification lo chhuah leh hian awmzia a nei thui lo palh thei a, compensation-a sum sen a ṭul tho dawn nia lang hian sorkarin lui kam tuak humhalh a tum dan hi hriatthiam a tiharsa zual hle.
He thilah hian lui leh a chhehvel ram humhalhna dan khingtu kan Mizo puite hi tu tute nge an nih a, eng tia rei nge ram/ lo/ huan an lo neih tawh a, Tuirial Hydel Project siamna tura compensation an beisei dante pawh hi hriat chian a chakawm a, an thlirna lam aṭanga thlir chuan thil âwm tak pawh a lo ni ve reng thei a; nimahsela Mizoram leh Mizo mipui tam zawk thlirna aṭang chuan kum 1965 aṭanga kan lui leh a chhehvel ram humhalhna dan hman tawh hman nawn duhna hi a lian zawk ngei ang.
Kan sorkarin lui kam tuak ram humhalhna dan ṭhiah a ni ta a pawmpui ang maia khin a tum miah lo mai hi thil mak tak a ni a, Central YMA-in khin let tuma hma an la erawh an fakawmin a lawmawm hle a ni.