Sorkar a mangang ta, Mipuiin i pui ang u

Health minister chuan Covid-19 avangin kan ramin harsatna lian tak a tawk mek tih sawiin kan health infrastructure-in a zawh loh hun a thlen mai a hlauhawm tih a sawi a, hripui chu vantlangah a ṭai darh tawh thu leh a him bik pawh sawi harsa a nih thu a sawi.

Sorkarin khawtlang hruaitute nena ṭang kawpa mahni venga Covid-19 veite enkawlna din dan a ngaihtuah ṭan a; Zoram Medical College-a Covid-19 positive enkawlte oxygen hman man lak ṭan a tum bakah sorkar hnathawkte ko khawma sum leh paia sorkar pui tura ngen a tum ta mek bawk a ni.

Tunah hian kan sorkar chuan zah pawh dawn loin kan dinhmun a chhiatzia a puang chhuak ṭan mek a, Covid-19 hri vei an tam avanga kan buaina piah lamah sum leh paia kan ram buaina pawh zep rual a ni ta lo. Covid-19 vei khung hrante pawhin an ei man an intum a ngai tawh a, tunah chuan oxygen hman man thlenga an chawi a ngaih tawh avang hian kan sorkar sum dinhmun hi a ṭha lo hle niin a ngaih theih.

Hei mai hi ni loin Mizoram sorkar hnathawk inzawmkhawm pawl, Federation of Mizoram Government Employees and Workers hnenah Mizoram sorkar chuan 'thawhlawm thawh tura ngenna' a siam ta hial a; hripui leng kara lockdown hnuaiah pawh sorkar hnathawkte inhmuhkhawm phalna pawh a tichhuak hial a ni.

Mizoram sorkar hian ma­mawh huna pawh theih hi budget-ah a ziakin sum chu a nei ngei mai a, SEDP atana sum dahte leh 'untied fund' pawh chhuah theih âwm takte pawh a nei niin a lang a; nimahsela hun harsa berah pawh heng pawisate hman mai lam sawi ri loa sorkar hnathawkte hnena pawisa a dil tawh hial avang hian sorkar hi sum lamah a harsa takzet a nih hmel.

Kan ram dinhmun en hian mipui pawhin sorkar hi kan theihna zawnah pui ila, Covid-19 avanga kan buaina leh chumi nghawng sum harsatnaah hian sorkar hi kan thiam leh theih angin i pui tlang ang u.