Sorkar inrenchem tawh se
Mizoram sorkar chuan Covid-19 dona atan sum a neih ngah tawk loh avangin sorkar hnathawkte ṭanpuina a dil a, sorkar hnathawk inzawm khawm pawl pawhin hripui dona atan an hlawh aṭangin sorkarah ṭanpuina pek an rem ti. Hetihlai hian political party hrang hrang chuan Mizoram sorkar chu hripui dona atana sum nei lo inti chunga thil danga inrenchem tum loah an puh.
Mizoram Pradesh Youth Congress Committee (MPYCC) chuan, sorkar hnathawkte hnena pawisa dil ngai hial khawpa sorkar sum dinhmun a ṭhat loh avangin Mizoram sorkar chu SEDP board 14-te ṭhiat turin an phût a; SEDP board 14-a thawktute hlawh atan kum khatah cheng nuai 2600 chuang sên ṭhin a nih bakah, inrêlbàwlna atan sum tam tak a ral thu an sawi.
ZPM party chuan, "Sum leh páiah harsatna nasa tak sorkarin a tâwk mek tih pawh a hna thawkte sum thawh tura sorkarin a ngenna hian a tilang chiangah kan ngai," an ti a, "Department-te hnena Other Charges hnuaia budget allocation a dah cheng vbc. 559 (4.94%) pawh hri léng vanga hnathawh theihna boruak mumal taka a awm hma chu budget re-appropriation/ budget cut nei mai turin kan ngen a ni," an ti. ZPM chuan, Chief Minister-in Assembly House-ah, 'Damlo apiangin damdawi-ina an rawn hman theih turin in khat tan nuai hnih thlengin SEDP-ah kan dah,' tia a sawi tawh angin, hripui veite enkawlna senso pawh SEDP aṭanga phuhru turin an phut bawk.
PC party chuan, ram hruaitute chêt danah inrenchemna hmuh tur a awm lo tih sawiin, "An duhsak zawng an siam theih nan mamawh em em lem lo hna thawh a la tam hle," an ti a; hripui dona lama insáwrbing a, thil danga inrenchem a, ṭul lutuk lo hnathawhte titawp rih a, mipui rawngbawl turin Mizoram sorkar an phût tih an sawi.
Mizoram sorkar hian sum a nei lo tih a pawm tawh a, 'Min ṭanpui rawh u,' tiin a hnuaia hnathawkte ngei pawh a ngen lêt tawh. Hetiang a nih hnu hi chuan sorkar pawh a sum hman danah insum deuh se, a loa awm theih hna ṭhenkhat hi tihtawp lailawk ni se, minister ṭhenkhatin sum tamzia an sawite pawh mipui zah avangin insûm deuh tawh se, SEDP board-te pawh hi a loa awm theih a nih chuan titawp ngam rawh se.
Kan sorkar hi sumah a buai mek tih a lang ta a, SEDP-a sum a dahte pawh hri dona atan theh chhuak phal se, inrenchem theihna awm ang angah Mizoram sorkar hi inrenchem tawh rawh se.