Sorkarin sum a nei lo nge, Hman phal loh a nei zawk?

Congress Legislature Party (CLP) leader Zodintluanga Ralte chuan, Mizoram sorkar chu hripui dona atana midangte thawh khawm suma innghat lo a, sorkar sum neih sa hmang turin a ngen a, "Sorkar hian SEDP-a mi te, PAHOSS sum te, Finance department hnuaia sum dahte a pawt khawm ang a, state sorkar sumin a daih ngang lo a nih chuan state dangte tih angin Central-ah pawh a dil belh thei a, mipui pawhin kan thawh duh ngei a rinawm," a ti.

CLP leader sawi danin CM Relief Fund-ah May 5 thleng khan Rs. 1,33,34,984 a awm a, Covid-19 dan bawhchhiate sum chàwi Rs. 1,77,90,800 a awm. SEDP-ah kum 2021-22 budget-ah cheng nuai 40,000 leh state sum liau liau tur Finance department-ah nuai 58,000 dah a ni bawk.

SEDP sum chu Chief Minister leh Finance Minister ni bawkin state-in a mamawh ang zelin a hmang thei tih a sawi a, "Hripui dona atan SEDP sum hi hman theih a nih lohna tur a awm lo a, an duhsak záwngte hna thawhna atan chauha hmang loin, hripui dona atan hmang turin ka ngen" a ti a; CM-in heng pawisa dahte hmang hian kum dangah a duhsak zawng minister a lo vulh tawh a, tunah chuan heng pawisa hi hripui dona atana hmang tawh zawk turin a ngen.

Mizoram sorkar chuan zah pawh dawn loin, "Sumah kan harsa e," tiin a hnathawkte ṭanpuina a dil a, sorkar hnathawk lamin hripui dona atan pawisa thawh hi an rem ti tawh a; nimahsela sorkar hnathawkte pawh hian sorkar chu inrenchem ve deuh se tih an sawi bakah sum hmanna ṭhenkhatah insum ve se an duh thu an sawi chhuak hial.

CMRF-a mipui pawisa thawhkhawm aṭangin TrueNat khawlte sorkar hian a lo lei tawh a, heng khawl (infrastructure) lam hi chu sorkar sum bawm aṭanga hman a inhmeh zawk tehlul nen mipui pawisa an hmang ta. Tunah mipui (sorkar hnathawkte) pawisa hmang bawkin hripui do a tum leh mek a; nimahsela Mizoram sorkar hian pawisa hi a head dangah a vaibelchhe tel a la nei reng tih budget aṭangin a lang.

Engpawhnise kan sorkar sum hman dan hi mipuiin an thlir reng tawh dawn a, midang hnena kutdawh chunga thil danga pâwr taka pawisa tamzia an sawi leh si a nih chuan kum 2023 inthlan thlengin a nghawng thei ang.