Covid-19 chungchang thuchhuaha Sorkar leh a hnathawkte inkar thu

Tun hnaiah State Referral Hospital-a Covid-19 en­kawlte'n oxygen an hman man lak a nih tawh tur thu SRH Medical Superintendent chuan thu a chhuah a; he thuchhuah hi sorkarin a hriatpui lo tiin thuchhuahtu hi insawifiah turin hriattirna (show cause notice) pek a ni.

Nikum September 1 khan ITI CCC-a Covid-19 hri kai enkawl zinga mi ṭhenkhat chu an negative tih finfiah a nih hmain chhuahtir an lo ni tawh a, Assembly House-ah hial sawi chhuah a ni. Hei hi sawifiahin Health Minister chuan, a hmuna medical officer leh CMO (W), Aizawl inrawnna anga an lo kalpui mai a nih thu leh, sorkar notification a awm loh thu sawiin positive chhuahtirte hi an ko kir leh vek tih a sawi.

Heng thil thlengte leh a hnua sorkar lamin a umzui dan han thlir thuak hi chuan, sorkar hi chu thiam lohna nei lo ang maiin a lang deuh zel a, a tisualtua puh zui erawh sorkar hnathawk medical doctor lam an ni ta zel a ni. Hetah hian thil chi hnih a awm thei a - pakhatnaah chuan sorkar hnathawh dan kalphungah, sorkar (government ) lam rawn loa mahni thu thua thil kalpui palh a awm thei; pahnihnaah sorkar hriatpuina ni si, ziaka awm loa officer (doctor) thuneihnaa an lo kalpui, mipuiin an sawisel hnua sorkarin a officer-te dem chunga a sût leh tak.

Mipui lam tan chuan, 'Sorkar aiawhin thu a chhuah a, sorkar vekin a sût leh a, a sorkar berin sorkar hnathawk an mawhpuh daih a' tia lo dawn­sawn mai loh chu sawifiah thiam a harsa ta viau a; thawhhona ṭha zawk neia thil inhre pawh tawn chungin sût leh zeng zung ngai loa kal inzir a hun ta.

Engpawhnise hripui leng mek avang hian sorkar lam tan pawh tih fuh loh leh tihsual palh hi a awm lo thei lo a, tun hnuah pawh a la awm belh zel mai thei e. Chuti chung chuan sorkar leh a hnathawkte inkara thil inhre tawn lo lutuk anga kal hi chu awm tawh lo thei se a lawmawm hle ang.