Gas semtute harsatna

Mizoram Indane Distributors Association (MIDA) chuan Covid-19 hri leng mek karah vaccine an la lak ve loh avangin hripui kai darhtu an nih theih avangin Mizoram puma eirawngbawlna gas sem hna chu chawlhsan an rel. MIDA hian Health Minister hnenah Covid-19 vaccine lak dilna hi an thlen tawh a, chhanna an la dawng lo a ni.

MIDA harsatna hi an thlirna zawn aṭanga thlir chuan thil tih awm tak a ni a, tunlai chhanah vaccine la loa mipui nena inhnai taka awm chu thil hlauhawm tak a ni. Hripui kai darhtuah an ṭang thei a, chumi piah lamah chuan mipui nawlpui nen inhnai taka an awm avangin mipui lam aṭanga hripui an kai pawh a hlauhawm tel bawk.

Hetihlai hian sorkarin vaccine a pek chhuah dan pawh hi thui tak chu hriatthiampui an ṭul. Sorkar laipui lam aṭangin ruahmanna awm sa anga an kal ve a ngai a, vaccine dawng thei leh dawng lo tur hi he lama thliar a ni kher awm lo e. Kum upa lamte leh frontline worker-te tan vaccine pek a ni mek a, chumi piah lamah sorkarin ruahmanna hranpa a siam thei a nih chuan a lawmawm a, chutiang remchang a awm a nih chuan gas semtute pawh ngaih pawimawh zingah nei tel thei se a ṭha hle ang.

Eizawnna hrang hrang a awm a, hri leng kara mipui dawr nasa ber pakhat chu nitin mamawh eichawp (essential commodity) dawr nghaktute leh filling station (petrol pump) lama hnathawkte hi an nih hmel. Anni lam hi chuan vaccine dawn loh avanga an hna chawlhsan lam hi an la sawi ve lo a, hri leng kara mipui an rilṭam mai lohna turin sorkarin hunbi a siamsakah chuan an la inhawng thei zel a ni.

Hripui a leng a, kan la hma­chhawn ngai loh harsat­nain min tlakbuak mek a, sorkar tan pawh rorel thiam a harsa dawn a, kan theihna zawnah sorkar i ṭawiawm zel ang u.